Путин илк бор Курил оролларига борди: Япония кескин норозилик билдирди

Кремл матбуот хизмати хабар беришича, Россия президенти Владимир Путин Итуруп оролига ташриф буюрди. Бу унинг Курил оролларига биринчи ташрифи саналади.

​Путин Ясний балиқни қайта ишлаш заводига, Курил марказий туман шифохонасига, Россия Қаҳрамони Е.Д. Норполов мактабига ташриф буюрди ва Сахалин вилояти губернатори Валерий Лимаренко билан учрашди.

​Лимаренко Путинга аҳоли билан учрашувларда, ҳатто энг чекка ҳудудларда ҳам "одамлар: "Ҳамма нарса ғалаба учун" дейишади", деди.

​"Бизнинг халқимиз шундай. Ғолибнинг генетик коди", деб жавоб берди Россия президенти (ТАСС иқтибос келтирган).

​Kyodo News хабар беришича, Япония Ташқи ишлар вазирлиги Путиннинг Курил оролларига ташрифи муносабати билан "қаттиқ норозилик" билдирди.

​Бир кун олдин Путин Тинч океани флоти машқларида сўзлаган нутқида Россия Курил ороллари масаласида Япониянинг собиқ бош вазири Синдзо Абэ ва бошқа япон раҳбарлари билан конструктив муносабатларга эга бўлганини, аммо Токио энди ўз позициясини ўзгартирганини айтди.

​Унинг сўзларига кўра, 1950-йилларнинг ўрталарида Япония билан тинчлик шартномаси ва натижада Курил ороллари масаласини ҳал қилиш йўлини очган декларация имзоланган. Бироқ, Путин таъкидлаганидек, Япония ўшанда декларацияга риоя қилишдан бош тортган, Россия эса Япония ҳукуматига мослашган ва тинчлик шартномасига эришиш йўлларини излаш учун мулоқотни қайта бошлаган.

​"Энди, афсуски, биз позицияда ўзгаришни кўрмоқдамиз, бу масала биз томондан ҳеч қандай тарзда қўзғатилмаган", деди Россия президенти.

​Иккинчи жаҳон урушидан кейин СССР Курил оролларини аннекция қилди. 1956 йилда Совет Иттифоқи Япония билан тинчлик декларациясини имзолади ва икки томон тинчлик шартномасини тузгандан сўнг Шикотан ва Хабомаи оролларини қайтаришга ваъда берди.

Кейинчалик, Япония ҳукумати барча оролларни қайтаришни талаб қила бошлади ва шу тариқа тинчлик шартномаси ҳеч қачон имзоланмади.