Ғарбий Европа ўз тарихидаги энг иссиқ июн ва июл ойларини бошдан кечирди

Европанинг Ерни доимий кузатиш дастури (Коперник иқлим ўзгариши хизмати) маълумотларига кўра, Ғарбий Европада энг иссиқ июн ва июл ойлари қайд этилди.

Май ойида бошланган кучли иссиқлик тўлқини кўплаб ўрмон ёнғинлари, узоқ давом этган қурғoқчилик ва минтақада янги миллий ҳарорат рекордларини келтириб чиқарди ва минглаб одамларнинг иссиқлик билан боғлиқ ўлимига сабаб бўлган деб тахмин қилинмоқда.

Коперник иқлим ўзгариши хизмати Ғарбий Европада июн ва июл ойларида ўртача ҳарорат 21,62°C ни ташкил этганини, бу 2022 йилнинг шу даврида ўрнатилган рекорддан юқори эканлигини хабар қилди.

"Доимий юқори босимли тизимлар Ғарбий Европада иссиқликни ушлаб турди; ҳаддан ташқари ҳарорат кенг тарқалган қурғоқчиликни кучайтирди. Тупроқлар қуриб бориши билан улар табиий совутиш қобилиятини йўқотади, бу эса иссиқликнинг тезроқ тўпланишига имкон беради", деб тушунтирди Европа Ўрта масофали об-ҳаво прогнозлари марказининг иқлим стратегияси менежери Саманта Бургесс.

"Бу иқлим ўзгариши ҳарорат экстремаллигини қандай кучайтираётганининг яққол намунасидир: иссиқлик ва қурғоқчилик тобора бир-биридан озиқланмоқда", деб қўшимча қилди у.

Умуман олганда, статистика маълумотларига кўра, 2026 йил ҳозирда 2024 ва 2025 йиллардан кейин дунё бўйлаб учинчи энг иссиқ йил ҳисобланади.

Бироқ, олимларнинг фикрича, 2026 йил охирига келиб 2024 йилдан ошиб, рекорд даражадаги энг иссиқ йилга айланиши (ёки ҳеч бўлмаганда бу кўрсаткичга яқинлашиши) эҳтимоли ортиб бормоқда.

Бу антропоген глобал исишнинг тезлашиши ва кучли Эль-Ниньо ҳодисаси - Тинч океанининг айрим қисмларида сув ҳароратининг даврий равишда кўтарилиши ва бутун дунё бўйлаб ҳарорат ўзгаришига олиб келиши билан боғлиқ бўлиши мумкин.