Тошкентда қурилиш фирмаси мансабдорларига нисбатан тергов бошланди
“New Port” турар-жой мажмуаси масъуллари аҳолига компенсация тўламаётгани маълум бўлган. Бундан ташқари қурилишга тегишли рухсатнома олмасдан туриб 20, 19 ва 12 қаватли турар-жой биноларини ўзбошимчалик қуришган.
Тошкентда қурилиш фирмаси мансабдорларига нисбатан тергов бошланди. Бу ҳақда Тошкент шаҳар прокуратураси хабар берди.
Жорий йилнинг 2 август куни ижтимоий тармоқларида “New Port” турар-жой мажмуасида фаолият юритувчи мансабдор шахслар томонидан Тошкент шаҳар, Яккасарой тумани, Дамариқ МФЙ, А.Қаҳҳор кўчаси, 19-уйда яшовчи фуқароларга компенсация пуллари тўлиқ тўлаб берилмаётганлиги ва ушбу уй ноқонуний бузилаётганлиги ҳақида видеоматериал тарқалган.
Ўтказилган терговга қадар текширувда “Mega Logistics Servise” МЧЖ мансабдор шахслари юқорида кўрсатилган манзилда яшовчи фуқароларни мажбурий кўчириш бўйича ижро ҳаракатлари якунланмаган бўлса-да, мазкур уйни ўзбошимчалик билан бузиб ташланганлиги аниқланган.
Шунингдек, қурилишга тегишли рухсатнома олмасдан туриб, ушбу ҳудудда 1 та 20 қаватли, 2 та 19 қаватли, 1 та 12 қаватли ва 1 та 2 қаватли турар-жой биноларини ўзбошимчалик билан қурилганлиги маълум бўлган.
Текширув натижасига кўра, “Mega Logistics Servise” МЧЖ мансабдор шахслари ва бошқаларга нисбатан жиноят иши қўзғатилиб, Тошкент шаҳар прокуратураси томонидан дастлабки тергов ҳаракатлари олиб борилмоқда.
Жиноят иши тергови алоҳида назоратга олинган бўлиб, натижаси бўйича қонуний қарор қабул қилиниши таъминланади, дейилади хабарда.
