Давактив собиқ раҳбари Акмалхон Ортиқов иши судга оширилди
У жорий йил январ ойида агентликдаги коррупциявий схемалар сабаб танқидга учраб, қамоққа олинганди.
Давактивнинг собиқ раҳбари Акмалхон Ортиқов иши судга оширилди. Бу ҳақда Жиноят ишлари бўйича Миробод туман суди томонидан 20 июлга cуд мажлисига тайинланган жиноят ишлари рўйхатида маълум қилинган.
Акмалхон Ортиқов Жиноят кодексининг 167 (ўзлаштириш ёки растрата йўли билан талон-торож қилиш), 206 (ҳокимият ёки мансаб ваколати доирасидан четга чиқиш) ҳамда 209-моддалари (мансаб сохтакорлиги) бўйича айбланмоқда.
Жиноят иши доирасида Ортиқов билан бирга яна 5 нафар шахс ҳам маҳкамада жавоб беради.
Эслатиб ўтамиз, жорий йил январ ойида Шавкат Мирзиёев агентликда коррупциявий схемалар аниқланганини маълум қилиб, Акмалхон Ортиқовни лавозимидан озод этган эди. Шундан сўнг у қамоққа олинганди.
