Валюта операцияларини амалга ошириш қоидаларига ўзгартириш киритилди
Ички валюта бозоридан сотиб олинган валюта маблағларидан фойдаланиш мақсадларини ўзгартириш имконияти яратилади.
Ўзбекистон Республикасида валюта операцияларини амалга ошириш қоидаларига ўзгартириш киритилди.
Адлия вазирлиги Ўзбекистон Республикасида валюта операцияларини амалга ошириш қоидаларининг 28-бандига ўзгартиришни давлат рўйхатидан ўтказди (рўйхат рақами 3281-6, 16.07.2026 й.).
Ўзбекистон Республикаси "Валютани тартибга солиш тўғрисида"ги Қонунининг 15-моддасига кўра, жорий халқаро операциялар билан боғлиқ ҳолда чет эл валютасини сотиб олиш ёки сотиш чекловларсиз амалга оширилади.
Бунда, махсус валюта ҳисобварақларига киритилган маблағлар қатъий равишда буюртмаларда кўрсатилган мақсадлар учун сарфланади.
Бугунги кунда бир шартнома доирасида сотиб олинган валюта маблағларидан бошқа шартнома учун фойдаланиш зарурати туғилганда, мижозлар томонидан ушбу валюталар банкка сотилиши ва янги мақсад учун қайта сотиб олиниши талаб этилади.
Мазкур идоравий ҳужжат билан тадбиркорлик субъектларига қўшимча қулайликлар яратиш мақсадида ички валюта бозоридан сотиб олинган валюта маблағларидан фойдаланиш мақсадларини ўзгартириш имконияти яратилмоқда.
