Жазирама янада кучаяди: нималар қилмоқ керак?

Жазирама иссиқ пайтида тананинг қизиб кетиши ва соғлиқнинг ёмонлашувига йўл қўймаслик учун оддий эҳтиёт чораларига риоя қилиш муҳим.

Жазирамада нималар қилиш кераклиги бўйича тавсиялар эълон қилинди.

Чанқоқ ҳис қилмасангиз ҳам, мунтазам равишда сув ичинг. Кофе, ширин газланган ва қувват берувчи ичимликларни чекланг.

Иложи борича, куннинг энг иссиқ пайтларида кўчага чиқманг. Жисмоний фаоллик ва зарур ишларни эрталаб ёки кечқурун бажариш тавсия этилади.

Очиқ рангли, енгил, кенг кийим ва бош кийим кийинг. Кўчада юрганингизда сояда ёки салқин хонада тез-тез дам олиб туринг.

Уйда тўғридан-тўғри тушадиган қуёш нурларидан пардаларни ёпинг, хоналарни салқин пайтда шамоллатинг ҳамда плита ва духовкадан камроқ фойдаланишга ҳаракат қилинг.

Кекса ёшдагилар, болалар, ҳомиладор аёллар ва сурункали касалликларга чалинган кишиларга алоҳида эътибор қаратинг. Уларни назоратсиз қолдирманг ва саломатлигидан мунтазам хабар олиб туринг.

Кучли ҳолсизлик, бош айланиши, бош оғриғи, кўнгил айниши, томир тортишиши ва кўп терлаш иссиқликдан толиқиш аломатлари бўлиши мумкин. Бундай одамни салқин жойга ўтказиш, ортиқча кийимларидан халос қилиш ва сув бериш керак.

Ҳушнинг чалкашиши ёки йўқолиши, терининг қуруқ ва иссиқ бўлиши, нафас олишнинг қийинлашиши ва қусиш иссиқ урганидан далолат бериши мумкин. Бундай вазиятда зудлик билан тез тиббий ёрдам чақириш лозим.

Ўзингизни ва яқинларингизни асранг.