Тошкент вилоятидаги боғчаларда оммавий заҳарланиш бўйича суд ҳукми ўқилди
Айбдорларга 3 йилдан 3,5 йилгача қамоқ ва озодлик чеклаш жазолари ҳам қўлланилган.
2025 йил сентябр ойида Тошкент вилояти боғчаларида кузатилган болаларнинг оммавий заҳарланиши юзасидан суд жараёни якунига етди.
Жиноят ишлари бўйича Бўка туман суди 11 нафар судланувчини Жиноят кодексининг 257-1-моддаси (санитарияга оид қонунчиликни ёки эпидемияга қарши кураш қоидаларини бузиш) 1-қисми билан айбли деб топди.
Суд ҳукми билан, қуйидаги шахслар 3,5 йил муддатга озодликдан маҳрум қилинди:
Р.О. (эркак, 1985 йилда Тошкент вилоятида туғилган, “Shark Milk Product” МЧЖ директори)
А.С. (эркак, 1987 йилда Қашқадарё вилоятида туғилган, “Shark Milk Product” МЧЖ бош технологи)
Р.Х. (эркак, 1982 йилда Тошкент вилоятида туғилган, “Shark Milk Product” МЧЖ технологи).
Қуйидаги шахслар 3 йил муддатга озодликдан маҳрум қилинди:
С.С. (эркак, 1985 йилда Тошкент вилоятида туғилган, “Shark Milk Product” МЧЖ таъсисчиси ва сотув бўлими менежери)
Ф.О. (эркак, 1990 йилда Тошкент вилоятида туғилган, “Shark Milk Product” МЧЖ таъсисчиси ва директори ўринбосари)
М.Н. (эркак, 1991 йилда Тошкент вилоятида туғилган, “Shark Milk Product” МЧЖ технологи ёрдамчиси)
Қуйидаги шахсларга 3 йил муддатга озодликни чеклаш жазоси тайинланди:
Ж.Х. (эркак, 1993 йилда Бухоро вилоятида туғилган, “Governess Business” МЧЖ директори)
И.С. (эркак, 2000 йилда Сирдарё вилоятида туғилган, “Innavation Outsourcing Servise” МЧЖ директори)
Б.Р. (эркак, 1992 йилда Сирдарё вилоятида туғилган, “Nishon invest” МЧЖ директори)
Ф.Д. (эркак, 1993 йилда Тошкент вилоятида туғилган, “Kinder Garden Group” МЧЖ директори)
Д.Қ. (аёл, 1997 йилда Тошкент вилоятида туғилган, “Shark Milk Product” МЧЖ лаборанти).
Суд ҳукми билан судланувчиларга Жиноят кодексининг 45-моддасига асосан муайян ҳуқуқдан маҳрум қилиш белгиланди.
Биринчи инстанция судининг ҳукми устидан шикоят берилиши ёки протест келтирилиши мумкин.
Эслатиб ўтамиз, 2025 йил 26 сентябр куни Бўка, Пискент, Оққўрғон, Қуйи Чирчиқ, Бекобод туманлари, Нурафшон ва Олмалиқ шаҳридаги бир қатор мактабгача таълим муассасаларида жами 2 мингга яқин тарбияланувчининг оммавий заҳарланиши рўй берганди.
