Малайзияда 3 нафар ўзбекистонлик ўлим жазосига ҳукм этилгани маълум бўлди
Сафар олдидан уларга номаълум шахс томонидан бўш чемоданлар берилган. Куала-Лумпурга етиб боргач, чемоданлар текширилганда ҳар бирида 4 килограммдан метамфетамин таблеткалари борлиги аниқланган.
Малайзияга саёҳатга борган 3 нафар ўзбекистонлик ўлим жазосига ҳукм қилингани маълум бўлди. Бу ҳақда истеъфодаги ДХХ ходими Ўктам Сувонов гиёҳвандликка қарши видеосуҳбат давомида маълум қилган.
Ўктам Сувоновга кўра, бу воқеа 10 йил аввал содир бўлган.
Уч нафар ўзбекистонлик аёл Малайзияга “бепул саёҳат” деб чақирилган. Улардан бирининг қизи маҳаллий фуқаролардан бирига турмушга чиққан бўлган.
Сафар олдидан эса кимлиги номаълум шахс томонидан бўш чемоданлар берилган. Куала-Лумпурга етиб боргач, чемоданлар текширилганда ҳар бирида 4 килограммдан метамфетамин таблеткалари борлиги аниқланган.
Энг ачинарлиси, улар чемоданларни ким берганини, нима учун берилганини билмаган. Натижада ўзлари англамаган ҳолда халқаро гиёҳвандлик жинояти иштирокчисига айланиб қолишган.
Ўктам Сувонов мазкур воқеани ўрганиш учун Малайзияга боргани ва гумонланувчилардан бири билан суҳбатлашганини айтиб ўтди. Малайзия қонунларига кўра, гиёҳванд моддаларнинг асл эгаси аниқланмаса, қўлга олинганлар жазоланиши кўзда тутилган. Шу сабабли Ўзбекистоннинг уч фуқаросига нисбатан жазо ижро этилган.
