Шавкат Мирзиёев Қатар амирига таъзия билдирди
Доҳа яқинидаги Рас-Лаффан саноат зонасидаги газни қайта ишлаш мажмуасида содир бўлган кучли портлаш ва ёнғин юз берди.
Ўзбекистон Республикаси Президенти Шавкат Мирзиёев Қатар Давлати Амири Шайх Тамим бин Ҳамад Ол Сонийга Рас-Лаффан саноат зонасидаги газни қайта ишлаш мажмуасида содир бўлган кучли портлаш ва ёнғин оқибатида кўплаб инсонлар ҳалок бўлгани ва жиддий жароҳат олгани муносабати билан таъзия йўллади.
Давлатимиз раҳбари қурбонларнинг оила аъзолари ва яқинларига чуқур ҳамдардлик билдирди, жароҳатланганлар тез орада шифо топишини тилади.
21 июнь куни кечқурун Қатарнинг Доҳа шаҳри яқинидаги Рас Лаффан (Ras Laffan) саноат зонасида жойлашган, давлатга қарашли QatarEnergy компаниясининг газ узатиш иншоотида кучли портлаш ва ортидан йирик ёнғин юз берди.
Натижада камида 13 киши ҳаётдан кўз юмган. Энергетика вазирлигининг маълум қилишича, қурбонларнинг барчаси хорижлик ишчилар (Ҳиндистон ва Покистон фуқаролари) бўлган.
66 киши турли даражада тан жароҳати олган.
