Фабио Каннаваро: "Футболчиларим билан ғурурланаман, улар яхши ўйнашди"
Бош мураббий иккинчи таймда Ўзбекистон вазиятни ўзгартиришга эришганини айтди.
Колумбияга қарши учрашувдан кейин Фабио Каннаваро иштирокида матбуот анжумани ўтказилди.
Унда жамоамиз бош мураббийси қуйидаги фикрларни билдириб ўтди:
“Учрашув қизиқарли ўтди. Иккинчи бўлимда биз ўйинни ўзгартиришга эришдик. Чап қанотдан имкониятлар яратдик. Ўйин назоратини ўз қўлимизга олишга ҳаракат қилдик.
Авваламбор, биз Ўзбекистонни бутун дунёга ижобий намойиш этиш учун бу ерга келдик. Мен доим жамоамга ўйин давомида фаол ҳаракат қилиш кераклигини айтиб келаман. Колумбия сингари жамоаларга қарши ўйнаш, тўпсиз ҳаракат қилиш осонмас. Умуман олганда, иккинчи бўлимда яхши ҳаракат қилдик, бироқ афсуски гол ўтказиб юбордик", дея таъкидлади бош мураббий.
"Биз бу стадионда ўтган ушбу ўйинни эслаб қоламиз. Чунки бу тарихий ўйин. Биз Жаҳон чемпионатидамиз. Бугунги ўйин биз учун яхши бўлди, деб айта оламан. Хатолар бўлди, улар устида ишлаймиз.
Футболчиларим билан ғурурланаман. Улар яхши ҳаракат қилишди. Бугун қийин ўйин бўлди. Бундай стадионда, мухлислар қаршисида ўйнаш осон эмас. Лекин бу сизга кўпроқ мотивация бериши ҳам мумкин”, дея хулоса қилди Ўзбекистон бош мураббийи.
Эслатиб ўтамиз, дастлабки баҳсда Ўзбекистон Колумбияга 1:3 ҳисобида имкониятни бой берди.
