Уч кун ичида Туркияда 4 нафар ўзбекистонлик вафот этди
11 июн куни Истанбулдаги Шимолий Мармара автомагистралида содир бўлган ЙТҲда 31 ёшли фуқаро ва унинг фарзанди ҳалок бўлган.
Сўнгги уч кун ичида Туркияда тўрт нафар Ўзбекистон фуқаросининг вафот этгани қайд этилди.
11 июн куни Истанбулдаги Шимолий Мармара автомагистралида содир бўлган йўл-транспорт ҳодисаси оқибатида ватандош 31 ёшли А.Ҳ., унинг туркиялик турмуш ўртоғи ва 2 ойлик фарзанди ҳалок бўлди.
12 июн куни Тузла туманида юз берган йўл-транспорт ҳодисаси натижасида 23 ёшли Ўзбекистон фуқароси Н.М. олган оғир тан жароҳатлари оқибатида вафот этди.
Шунингдек, узоқ вақт онкологик касаллик билан курашиб келган яна бир нафар 58 ёшли аёл бугун Истанбулдаги шифохоналардан бирида ҳаётдан кўз юмди.
Ўзбекистоннинг Истанбул шаҳридаги Бош консулхонаси марҳумларнинг оила аъзолари ва яқинларига чуқур таъзия билдирган. Консулхона томонидан Вазирлар Маҳкамаси ҳузуридаги Миграция агентлиги билан ҳамкорликда жасадларни Ватанга юбориш ва бошқа зарур масалалар юзасидан тегишли консуллик-ҳуқуқий ёрдам кўрсатилмоқда.
