Таҳлил: Тошкентда уй-жой ижараси таклифлари камайди

Тошкент уй-жой ижара бозори таҳлил қилинди.

Вазирлар Маҳкамаси ҳузуридаги Макроиқтисодий ва ҳудудий тадқиқотлар институти (МҲТИ) томонидан 2026 йилнинг май ойида Тошкент шаҳридаги уй-жой ижара бозори таҳлил қилинди.

Умумий медиан ижара нархи 550 АҚШ доллари даражасида сақланиб қолди.

2026 йил май ойида Тошкент шаҳрида уй-жой ижарасининг умумий медиан нархи 550 долларни ташкил этди. Бу апрел ойидаги кўрсаткич билан бир хил, 2025 йил май ойидагига нисбатан эса 10% юқори.

Ижара таклифлари сони сезиларли даражада қисқарди.

Май ойида ижара эълонлари сони 18,1 мингтага тушди. Бу апрель ойидаги 22,8 мингта эълонга нисбатан қарийб 21% кам:

- 2026 йил январь–март: 22,6 мингта (ўртача)

- 2026-йил апрель: 22,8 мингта

- 2026-йил май: 18,1 мингта

Таклиф ҳажми бўйича Мирзо Улуғбек тумани етакчи.

Эълонларнинг энг катта қисми учта туманда жамланган:

- Мирзо Улуғбек: 16,9%

- Миробод: 12,9%

- Юнусобод: 12,6%

Топ 3 та туман жами таклифларнинг 42,4%ини қамраб олди.

Энг юқори ижара нархлари Миробод, Шайхонтоҳур ва Яккасаройда шаклланмоқда.

Тошкент ижара бозорида ҳудуд омили нархга сезиларли таъсир қилмоқда. Айниқса 3 хонали ва 4+ хонали уй-жойлар бўйича қиммат ва арзон ҳудудлар ўртасидаги тафовут 2 баробардан юқори.

Хоналар сони бўйича энг қиммат ва нисбатан арзон ҳудудлар:

- 1 хонали: Мирободда 600 доллар, Олмазор, Сергели ва Учтепада 350 доллар

- 2 хонали: Миробод ва Шайхонтоҳурда 700 доллар, Сергели ва Учтепада 400 доллар

-3 хонали: Миробод ва Шайхонтоҳурда 1000 доллар, Сергели ва Учтепада 450 доллар

- 4+ хонали: Мирободда 1150 доллар, Яккасаройда 1100 доллар, нисбатан арзон ҳудудларда 500-550 доллар.

Бозорнинг асосий сегменти 2 хонали хонадонлар бўлиб қолмоқда.

Май ойида ижара эълонларининг 86%га яқини 2 ва 3 хонали хонадонлар ҳиссасига тўғри келди.

- 2 хонали хонадонлар: 59,6%

- 3 хонали хонадонлар: 26,0%

- 1 хонали хонадонлар: 10,9%

- 4+ хонали хонадонлар: 3,5%

Хоналар кесимида нарх динамикаси турлича шаклланди.

- 1 хонали: 400 доллар, йиллик ўсиш 14,3%

- 2 хонали: 500 доллар, йиллик ўзгариш 0,0%

- 3 хонали: 700 доллар, йиллик ўзгариш 0,0%

- 4+ хонали: 800 доллар, йиллик пасайиш 20,0%

Хулоса: 2026 йил май ойида Тошкент ижара бозорида умумий медиан нарх барқарор сақланиб қолди. Бироқ ҳудудлар ва хоналар сони кесимида тафовут юқорилигича қолмоқда. Бозор таклифи асосан 2 хонали хонадонлар атрофида жамланган. 1 хонали хонадонларда нархларнинг йиллик ўсиши юқори, 4+ хонали сегментда эса пасайиш кузатилмоқда.

Инвесторлар учун: 1 хонали хонадонлар нархининг йиллик ўсиши ушбу сегментда ликвидлик нисбатан юқори эканини кўрсатади.

Ижарачилар учун: 1 хонали хонадонларда нарх босими юқорироқ. 4+ хонали хонадонларда эса келишув имконияти кенгроқ бўлиши мумкин.

Мулкдорлар учун: ижара нархини белгилашда шаҳар бўйича умумий медианага эмас, аниқ туман, хоналар сони ва сегментдаги таклиф ҳажмига таяниш муҳим.