Ўзбошимчалик билан эгалланган ерларга эгалик қилиш осонлашади
Бунда жисмоний ва юридик шахсларнинг кўчмас мулк объектларига бўлган ҳуқуқларини эътироф этишга тўсқинлик қилувчи омилларни бартараф этиш кўзда тутилган.
Ўзбошимчалик билан эгалланган ерларга эгалик қилиш жараёни соддалаштирилмоқда.
Сенатнинг навбатдаги 15-ялпи мажлисида “Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида”ги Қонун кўриб чиқилди.
Қайд этилишича, ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга нисбатан ҳуқуқларни эътироф этиш ишларини янада жадаллаштириш, ваколатли ташкилотларнинг масъулиятини ошириш, ҳуқуқни эътироф этиш билан боғлиқ айрим механизмларни соддалаштириш, фуқаролар учун қўшимча қулайликлар яратиш зарурати юзага келмоқда.
Мазкур Қонун билан “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги ҳамда “Кўчмас мулкка бўлган ҳуқуқларни давлат рўйхатидан ўтказиш тўғрисида”ги қонунларга ҳуқуқларни эътироф этиш билан боғлиқ бўлган ҳужжатларни кўриб чиқиш муддатларини қисқартиришга ҳамда ҳуқуқларни эътироф этиш ишлари билан боғлиқ шикоятларни кўриб чиқиш жараёнларини такомиллаштиришга қаратилган ўзгартириш ва қўшимчалар киритилмоқда.
Хусусан, солиқ қарздорлиги тушунчаси аниқлаштирилиб, ер участкасига бўлган ижара ҳуқуқини эътироф этиш учун бир марталик тўловни бўлиб-бўлиб тўлаш тартиби ва шартлари жорий этилмоқда.
Сенаторларнинг фикрича, ушбу қонун билан киритилаётган нормалар жисмоний ва юридик шахсларнинг кўчмас мулк объектларига бўлган ҳуқуқларини эътироф этишга тўсқинлик қилувчи омилларни бартараф этишга хизмат қилади.
Муҳокама якунида сенаторлар қонунни маъқуллади.
