АҚШдаги отишмада ҳалок бўлган шахснинг яқинлари OpenAIʼни судга берди

2025 йил Флорида штати университетида содир бўлган отишмада ҳалок бўлган эркакнинг оиласи АҚШ судида OpenAIʼга қарши даъво аризаси билан мурожаат қилди.

Улар ChatGPT отишмада ўқ узган шахсга ҳужумни режалаштиришда ёрдам берганини даъво қилди, деб хабар беради Reuters.

Марҳум Тиру Чуббанинг оиласи томонидан берилган даъвода ChatGPT отишмада шерик бўлганлиги, чунки Феникс Икнер сунъий интеллект томонидан тақдим этилган маълумотлардан фойдаланган ҳолда ҳужумни режалаштирган ва амалга оширганлиги айтилган.

Даъвогарлар шунингдек, OpenAIʼни чатботлар билан ишлаш билан боғлиқ хавфлар ҳақида жамоатчиликни огоҳлантирмаганликда айбламоқда.

"Ўтган йили Флорида штати университетида содир бўлган оммавий отишма фожиа бўлди, аммо ChatGPT бу даҳшатли жиноят учун жавобгар эмас. Бу ҳолатда ChatGPT интернетда осонгина мавжуд бўлган маълумотларга асосланган саволларга фактик жавоблар берди ва ноқонуний ёки зарарли фаолиятни рағбатлантирмади ёки тарғиб қилмади", деди OpenAI вакили Дрю Пусатери ўз баёнотида.

Унинг таъкидлашича, отишмадан сўнг компания гумондор билан боғлиқ деб тахмин қилинган аккаунтни аниқлаган ва уни проактив равишда ҳуқуқни муҳофаза қилиш органларига топширган. Унинг қўшимча қилишича, компания зарарли ниятларни аниқлашни яхшилаш устида доимий равишда иш олиб бормоқда.

2025 йил апрел ойи ўрталарида шериф ўринбосарининг ўғли Таллахассее шаҳридаги Флорида штати университети кампусида икки кишини ўлдирди ва тўрт кишини яралади. Полиция ҳибсга олиш пайтида ўт очди, ҳужумчини яралади. Унга қотиллик ва суиқасд айбловлари қўйилди.