Италиянинг Ўзбекистондаги собиқ элчиси қўлга олинди
У Россия фуқароларидан виза бериш эвазига пул олишда айбланган.
Италиянинг Ўзбекистондаги собиқ элчиси қўлга олинди.
Италиянинг La Republica газетасининг ёзишича, 2025 йил декабрь ойида лавозимидан четлатилган элчи Пьергабриэле Пападиа де Боттини ди Сант-Аньезе Шенген визаларини ноқонуний бериш схемасини ташкил қилишда, ноқонуний иммиграцияга ёрдам беришда ва коррупцияда гумон қилинмоқда.
Тергов маълумотларига кўра, Пападиа ўзининг ёрдамчиси Татяна Тараканова билан биргаликда Россия фуқароларига, ҳатто улар Шенген ҳудудига кириш учун қонуний талабларга жавоб бермаса ҳам, узоқ муддатли туристик визалар (бир йилдан уч йилгача) бериш тизимини ташкил қилган.
Виза беришда ёрдам учун Пападиа ва Тараканова ҳар бир киши учун 4000 дан 16000 еврогача сўрашган.
Ушбу схемада учта Москва сайёҳлик агентлиги иштирок этган: Happy Travel, Visa4you ва Park Lane. Ҳаммаси бир хил манзилда рўйхатдан ўтган. Хабар қилинишича, камида 95 киши ноқонуний равишда виза олишга муваффақ бўлган.
Ишдан бўшатилишига олиб келган текширув давомида Пападианинг ўзи "пулга муҳтож" эканлигини айтди.
