Тошкентда профилактика катта инспектори 10 минг доллар билан ушланди
У фирибгарлик йўли билан чет эл фуқаросидан 450 минг АҚШ доллари олган шахсга нисбатан жиноят иши қўзғатиш ва уни жавобгарликка тортишни ваъда берган.
Профилактика инспектори 10 минг доллар олган вақтида ушланди.
Давлат хавфсизлик хизматининг Тошкент шаҳар бўйича бошқармаси ва Бош прокуратура ҳузуридаги Департамент ходимлари ҳамкорлигида тезкор тадбир ўтказилди. Унда Учтепа тумани ИИО ФМБ Ҳуқуқбузарликлар профилактикаси бўлими профилактика катта инспектори 1995 й.т. фуқародан ноқонуний равишда 10 минг АҚШ доллари олган вақтида ашёвий далиллар билан ушланди.
Аниқланишича, инспектор 2025 йилнинг декабр ойида мазкур фуқарога тегишли МЧЖ ҳужжатларини сохталаштириш орқали IT-хизмати кўрсатиш эвазига фирибгарлик йўли билан чет эл фуқаросидан 450 минг АҚШ доллари олган 1990 й.т. шахсга нисбатан жиноят иши қўзғатиш ва уни жавобгарликка тортишни ваъда бериб, ушбу пул маблағини талаб қилган.
Терговга қадар текширув давомида аниқланишича, жорий йилнинг феврал ойида ички ишлар органлари томонидан МЧЖ билан боғлиқ фирибгарлик ҳолати бўйича жиноят иши қўзғатишни рад этиш тўғрисида қарор қабул қилинган.
Ҳозирда катта инспекторга нисбатан жиноят иши қўзғатилиб, тергов ҳаракатлари олиб борилмоқда.
Аввалроқ Чирчиқда ҳам профилактика инспектори ушланганди.
