Трамп тинчлик бўйича Нобел мукофотига номзод сифатида кўрсатилган бўлиши мумкин
Ҳозирда мукофотга 287 нафар даъвогар илгари сурилди, бироқ улар тасдиқдан ўтганича йўқ.
Норвегия Нобел институти директори Кристиан Берг Харпвикеннинг сўзларига кўра, АҚШ президенти Доналд Трамп 2026 йилги Нобел тинчлик мукофотига номзод бўлган 287 киши орасида бўлиши мумкин. Бу ҳақда Reuters агентлиги ёзмоқда.
Харпвикен номзодларнинг 208 нафари жисмоний шахслар ва 79 нафари ташкилотлар эканлигини таъкидлаб, рўйхатда кўплаб янги номзодлар пайдо бўлганини қўшимча қилди.
Reuters хабар беришича, бу йил Трамп мукофотга Камбоджа, Исроил ва Покистон раҳбарлари томонидан номзод қилиб кўрсатилган. Бироқ, унинг номзоди ҳали тасдиқланмаган.
Номзодлик мукофот берувчи ташкилот томонидан қўллаб-қувватланишни англатмайди.
Ўтган ёзда Камбоджа Бош вазири Хун Манет Нобел тинчлик қўмитасига АҚШ президентига "дунё тинчлигини ривожлантиришга қўшган тарихий ҳиссасини эътироф этиш" учун тинчлик мукофотини беришни таклиф қилган хат юборди.
Трамп номзодини қўйгандан сўнг, Россия президенти Владимир Путин "АҚШ президенти бутун дунё бўйлаб мураккаб ва узоқ давом этган можароларни ҳал қилиш учун кўп ишлар қилаётганини" айтди.
Ўтган йилги Нобел тинчлик мукофоти Венесуэла мухолифати етакчиси Мария Корина Мачадога насиб этди, у "Венесуэлада демократияни ривожлантиришга қаратилган саъй-ҳаракатлари учун" мукофотга сазовор бўлди. Трамп энди Нобел қўмитасининг фикрига аҳамият бермаслигини билдирди.
Жорий йилнинг январ ойида Мачадо Венесуэла президенти Николас Мадурони АҚШ эгаллаб олганидан сўнг мукофотни Трампга топширишга тайёрлигини эълон қилди. Бироқ, Нобел қўмитаси Нобел тинчлик мукофотини бошқа шахсга ўтказишнинг иложи йўқлигини таъкидлади.
