Ўзбекистонда АЭС қурилишининг биринчи босқичи тахминан 1 млрд долларга тушади
Бу ҳақда Савдо-саноат палатаси раиси ўринбосари Суҳроб Абдураҳмонов гапирди.
Ўзбекистонда иккита кичик реакторли интеграциялашган атом электр станцияси қурилишининг биринчи босқичи қиймати тахминан 1 миллиард долларга баҳоланди.
Бу ҳақда Ўзбекистон Савдо-саноат палатаси раиси ўринбосари Суҳроб Абдураҳмонов Тошкентда бўлиб ўтаётган "Иннопром: Марказий Осиё" халқаро саноат кўргазмаси доирасида маълум қилди.
Унинг сўзларига кўра, лойиҳа ҳар бири 55 МВТ қувватга эга иккита кичик реактор қуришни ўз ичига олади. У бундай кенг кўламли лойиҳани амалга ошириш учун катта ҳажмдаги юқори сифатли маҳсулотлар ва турли соҳаларни жалб қилиш талаб этилишини таъкидлади.
Абдураҳмонов лойиҳа мамлакатда саноат стандартларини ошираётганини таъкидлади. Унинг ҳисоб-китобларига кўра, электротехника компаниялари, қурилиш материаллари ишлаб чиқарувчилари ва бошқа тегишли соҳалар юқори сифат ва технологик модернизация даражасига ўтишга мажбур бўлмоқда.
Шунингдек, Жиззах вилоятида атом электр станцияси қурилиши йирик саноат ва хизмат кўрсатиш кластерини шакллантириш учун шароит яратиши таъкидланди. Бунга транспорт ва логистика инфратузилмаси, техник хизмат кўрсатиш ва ижтимоий соҳани ривожлантириш киради.
Амалдорнинг сўзларига кўра, лойиҳанинг амалга оширилиши янги иш ўринларини яратишга олиб келади ва минтақада кичик ва ўрта бизнесни ривожлантиришга туртки беради.
