Россия ички ишлар вазири КХДРга борди
Томонлар ҳуқуқни муҳофаза қилиш соҳасидаги ҳамкорликни муҳокама қилишади. Шимолий Корея Россияни Украина урушида энг кўп қўллаётган давлатлардан биридир.
Россия Ички ишлар вазири Владимир Колоколцев Пхенянга ишчи ташриф билан борди. Бу ҳақда Ички ишлар вазирлиги вакили Ирина Волк маълумот берди.
Унинг сўзларига кўра, вазир Шимолий Корея жамоат хавфсизлиги вазири Пан Ду-Суб билан музокаралар олиб боради. Томонлар ҳуқуқни муҳофаза қилиш соҳасидаги ҳамкорликни муҳокама қилишади.
Ташриф доирасида бошқа ишчи учрашувлар ва хотира тадбирлари ҳам режалаштирилган.
23 март куни Россия президенти матбуот котиби Дмитрий Песков Шимолий Корея раиси Ким Чен Иннинг Россияга ташрифи дипломатик каналлар орқали сана бўйича келишиб олингандан сўнг амалга оширилиши мумкинлигини маълум қилди.
Владимир Путин Пекиндаги музокаралардан сўнг Шимолий Корея етакчисига 2025 йил 3 сентябрда Россияга ташриф буюришга таклифнома юборди. 2026 йил март ойида Россия президенти ҳам Ким Чен Инни қайта сайлангани билан табриклаб, икки мамлакат ўртасида стратегик шерикликни ривожлантириш ниятини тасдиқлади. Шимолий Корея Россияни Украина урушида энг кўп қўллаётган давлатлардан биридир. Ўтган йиллар давомида Пхенян Москва ихтиёрига ўн мингдан ошиқ аскар юборгани айтилади.
