ОАВ: Эрон АҚШ билан музокараларни давом эттиришга рози бўлди

ОАВ хабарига кўра, Эрон АҚШ билан иккинчи тур музокараларига рози бўлган.

Эрон ҳозирча урушга чек қўйиш бўйича музокараларда иштирок этишини расман тасдиқламаган бўлса-да, оммавий ахборот воситалари Ислом Республикаси Олий раҳбаридан тегишли рухсат олингани ҳақида хабар бермоқда.

Axios нашри берган маълумотларга кўра, АҚШ вице-президенти Ж.Д. Вэнс урушни тугатишга қаратилган эҳтимолий келишув юзасидан Эрон билан музокаралар ўтказиш учун Покистон пойтахтига боради.

Эрон томони музокараларнинг иккинчи босқичида қатнашишини ҳали ҳамон тасдиқлагани йўқ. Axios нашрининг ёзишича, Оқ уй душанба куни давомида Теҳрондан музокарачилар гуруҳи Исломободга юборилиши ҳақида ишора кутган.

Манбанинг таъкидлашича, эронликлар Ислом инқилоби посбонлари корпусининг босими туфайли жараённи кечиктирмоқда Корпус қатъий позицияда туриб, АҚШ томонидан Ҳормуз бўғози блокадаси бекор қилинмагунча музокаралар ўтказилишига қарши чиқмоқда.

"Эрон делегацияси Олий раҳбар (Мужтаба Хоманаий)дан рухсат кутаётган эди. Манбага кўра, бу розилик душанба куни кечқурун олинган", — деб ёзади Axios.

АҚШ–Эрон музокаралари атрофида ноаниқлик ҳукм сурмоқда: Трамп учрашувлар тез орада бўлиб ўтишини ваъда қилган бўлса-да, Теҳрон ҳозирча уларни режалаштирмаётганини билдирган.

Кеча Эрон томонидаги манба Reuters агентлигига берган интервьюсида, расмий баёнотларга қарамай, Теҳрон музокараларда иштирок этиш имкониятини кўриб чиқаётгани, бироқ якуний қарор қабул қилинмаганини айтди. Покистондаги манба эса агентликка сулҳ муддати сешанба куни соат 20:00 да (Гринвич бўйича ярим тунда) тугашини маълум қилди.

"Трамп амалда муддатни бир кунга узайтирди. Сулҳ келишувида кўрсатилган икки ҳафталик муддат сешанба куни тугашига қарамай, у муддат чоршанба куни кечқурунгача эканини айтди", — дея хабар беради Axios.

Икки манбанинг маълум қилишича, Вэнс сешанба куни эрталаб Покистонга учиб кетади, учинчи манба эса жўнаб кетиш душанба оқшомида содир бўлиши мумкинлигини айтган. Бироқ Reuters манбасига кўра, Вэнс ҳали ҳам Қўшма Штатларда бўлиб турибди. Бошқа бир манба Америка делегацияси ҳали йўлга чиқмаганини, аммо тез орада Исломободга боришни режалаштираётганини аниқлаштирди.

CNN манбалари ҳам ушбу маълумотни тасдиқлаб, АҚШ ва Эрон делегацияларининг иккинчи босқич учрашуви чоршанба, 22 апрелга белгиланганини билдиришди. Шунга қарамай, АҚШ ва Эрон ўртасидаги доимий кескин баёнотлар туфайли вазият беқарорлигича қолмоқда.

Оқ уй CNN телеканалига ҳозирча расмий сана белгиланмаганини, аммо делегация тез орада жўнаб кетиши кутилаётганини маълум қилди.

АҚШ Президенти Дональд Трамп New York Post газетасига берган интервьюсида Вэнснинг музокараларда иштирок этишини эълон қилди. Вэнс 18–19 апрел кунлари бўлиб ўтган музокараларнинг биринчи босқичида ҳам АҚШ делегациясига раҳбарлик қилган эди. Шунингдек, учрашувларда Стив Уиткофф ва Жаред Кушнернинг ҳам иштирок этиши кутилмоқда.