Эрон бир кун аввал очилган Ҳормуз бўғозини ёпди
Бўғоз Ливандаги вақтинчалик сулҳдан кейин очилганди. Лекин Теҳрон АҚШ блокадаси сабаб ҳарбий назоратни тиклашга қарор қилди.
Эрон Қуролли Кучлари Қўшма Штатларнинг "қароқчилик" ҳаракатлари туфайли Ҳормуз бўғози устидан ҳарбий назоратни тиклашга қарор қилди. Бу ҳақда Эрон Ҳарбий Қўмондонлиги Марказий штаб-квартираси вакилининг баёнотида айтилади.
"Аввал эришилган келишувларга мувофиқ, Эрон Ислом Республикаси чекланган миқдордаги нефт танкерлари ва савдо кемаларининг Ҳормуз бўғозидан назорат остида ўтишига рухсат беришга виждонан рози бўлди.
Бироқ, америкаликлар ўз мажбуриятларини бир неча бор бузиб, қароқчилик ва талончилик билан шуғулланишда давом этмоқдалар", дейилади баёнотда (Ислом инқилоби қўриқчилари корпуси матбуот хизматидан иқтибос келтирган ҳолда).
АҚШнинг ҳаракатлари туфайли "стратегик муҳим бўғоз қуролли кучларнинг тўлиқ назорати остида". АҚШ Эрон портларига ва ундан кемаларнинг тўлиқ ҳаракатланиш эркинлигини тикламагунча, "Ҳормуз бўғозидаги вазият аввалгидек қолади", деб қўшимча қилинади баёнотда.
17 апрел куни тушдан кейин Эрон сулҳ муддати давомида Ҳормуз бўғозининг тижорат кемалари учун тўлиқ очилишини расман эълон қилди. Бунга Ливандаги оташкесим сабаб қилиб кўрсатилган.
Ўша куни кечқурун Эрон Ҳарбий-денгиз кучлари Ҳормуз бўғози учун янги навигация қоидаларини эълон қилди. Ушбу режаларга кўра, фуқаролик кемалари Теҳрон томонидан белгиланган йўналишлар бўйлаб ва фақат ҳарбийларнинг розилиги билан ҳаракатланади.
