Виктор Орбан партияси Венгриядаги сайловларда мағлубиятга учради
Сайлов натижалари тўлиқ эълон қилинмаса ҳам, мухолифат ғалаба қозониши деярли аниқ бўлди. Орбан 2010 йилдан буён бош вазир эди.
Венгрия мухолифатининг "Тиса" партияси етакчиси Петер Мадяр Венгрия парламент сайловларида ғалаба қозонганини эълон қилди.
У 12 апрел куни кечқурун Будапештда бўлиб ўтган митингда нутқ сўзлади.
"Тиса" ва Венгрия бу сайловларда ғалаба қозонишди. Бу кичик ғалаба эмас, балки жуда катта ғалаба. Биргаликда биз Орбан тизимини ўзгартирдик. Биргаликда биз Венгрияни озод қилдик ва уни қайтариб олдик", деди Мадяр.
У шунингдек, мамлакатнинг Европа Иттифоқи ва НАТОдаги тўлиқ аъзолигини тиклашини ва Венгрияда демократияни мустаҳкамлаш чораларини кўришини айтди. "Биз демократия ва унинг мустақиллигини таъминлайдиган институтларнинг фаолиятини тиклаймиз. Венгрия яна бир бор Европа Иттифоқи ва НАТОда кучли иттифоқчига айланади", деди сиёсатчи.
Овоз бериш 12 апрель куни соат 20:00 да якунланди.
Венгрия Бош вазири Виктор Орбан парламент сайловлари натижаларини ҳукмрон" Фидес" партияси учун "оғриқли ва тушунарли" деб атади. У мухолифатдаги "Тиса" партияси етакчиси Петер Мадярни ғалабаси билан табриклаганини айтди.
"Бу натижа мамлакатимиз ва миллат тақдири учун нимани англатишини ва унинг чуқурроқ ёки юқорироқ маъносини ҳозир билмаймиз; вақт кўрсатади. Натижа қандай бўлишидан қатъий назар, биз мухолифат сифатида мамлакатимизга ва Венгрия миллатига хизмат қиламиз", деди Орбан" Фидес" штаб-квартирасида тарафдорлари олдида нутқ сўзлаганида.
Виктор Орбаннинг сўзларига кўра, "Фидес"га "мамлакатни бошқариш имконияти берилмади".
"Биз ҳеч қачон таслим бўлмаймиз. Олдинда турган бу кунлар ҳозирча яраларимизни даволашга сарфланади, аммо кейин иш яна бошланади", деб қўшимча қилди Орбан.
"Раҳмат, Венгрия", деб ёзди Петер Мадяр ижтимоий тармоқларда. Унинг қўшимча қилишича, Виктор Орбан, шунингдек, Франция президенти Эммануэл Макрон ва Европа Парламенти аъзоси Манфред Вебер уни ғалабаси билан табриклашган. Миллий сайлов бюроси маълумотларига кўра, сайловчиларнинг иштироки 77,8% ни ташкил этди. Бюллетенларнинг 72,44% қайта ишлангандан сўнг, "Тиса" 53,45% овоз ва парламентдаги 199 ўриндан 138 тасини олди. "Фидес" 37,92% овоз ва 54 ўринни олди. Венгрия Миллий Ассамблеяси кейинги 30 кун ичида янги бош вазирни сайлаш учун йиғилади. Виктор Орбан 2010 йилдан бери Венгрия бош вазири лавозимида ишлаб келмоқда.
