НАТОнинг ўрнини босувчи янги ҳарбий иттифоқ тузиш таклиф этилди
Бу ҳақда Трампнинг Украина бўйича собиқ махсус элчиси Кит Келлог гапирди. У НАТОни "қўрқоқ ва самарасиз" ташкилот деб номлаган.
Истеъфодаги генерал-лейтенант ва АҚШ президентининг Украина бўйича собиқ махсус элчиси Кит Келлогг НАТО Эрон ва АҚШ-Исроил ҳарбий можароси пайтида ўзини "қўрқоқ" ва самарасиз эканлигини исботлаганини айтди.
У алянснинг ўрнини босувчи янги иттифоқ тузишни таклиф қилди, деб хабар беради Fox News.
"Мавжуд мудофаа иттифоқларни қайта кўриб чиқинг, эҳтимол Япония, Австралия ва жанговар ҳаракатларга тайёр бўлган баъзи Европа мамлакатлари, масалан, янги кучга эга бўлган Германия ёки Полша билан иттифоқ тузинг. Ҳатто ўзини яхши иттифоқчи сифатида кўрсатган Украина билан ҳам", деди Келлогг.
АҚШнинг собиқ миллий хавфсизлик бўйича маслаҳатчиси ўринбосари Виктория Коуц генералнинг фикрини қувватлади.
"Улар Иккинчи Жаҳон урушидан бери Европадаги энг йирик урушни бошқара олмайдилар. Улар буни ўз қитъасида ҳам бошқара олмадилар. Шунинг учун менимча, бизга Яқин Шарқда улар ҳақиқатан ҳам керак эмас", деди у.
Коуц НАТОнинг қўллаб-қувватлаши "яхши бўларди", деб таъкидлади, аммо президент Доналд Трамп аллақачон "Қўшма Штатлар Исроил каби чинакам ғайратли иттифоқчи билан нима қила олишини намойиш этди".
Унинг таъкидлашича, Эрон ҳарбийларига етказилган вайронагарчилик Россия ва Хитой учун кучли тўхтатувчи омил бўлиб хизмат қилади.
АҚШ собиқ давлат котиби Майк Помпео НАТОни ўнлаб йиллар давомида муҳим иттифоқчи деб ҳисоблаганини, аммо энди иттифоқ мамлакатлари фаол ва муҳим эмаслигини айтди. Унинг фикрича, АҚШ ўз иттифоқчилари кимлигини ва уларга қандай ишониш мумкинлигини тубдан қайта кўриб чиқиши керак бўлади.
