Хоразмда бюджетдан 16 млрд сўмдан ошиқ пул ажратилади
"Лазги" III халқаро рақс фестивалини ташкил этиш ва ўтказиш учун 2 млрд сўм берилади.
Хоразмда бюджетдан 16,3 млрд сўмдан ошиқ пул ажратилади. Бу ҳақда Халқ депутатлари Хоразм вилояти кенгаши қарорида айтилади. Қарор 2026 йил 30 март куни эълон қилинган.
Ушбу маблағларнинг асосий қисми қурилиш ва тадбирларга йўналтирилади.
Йил бошида аниқланган эркин қолдиқ маблағлари ҳисобидан жами 16 млрд 322,1 млн сўм турли йўналишларга сарфланади.
Қарорга кўра, маблағларнинг энг катта қисми қурилиш ва инфратузилма лойиҳаларига ажратилган. Хусусан, вилоят ҳокимлиги ҳузуридаги “Ягона буюртмачи хизмати” орқали амалга ошириладиган маъмурий бинолар ва хизмат уйлари қурилиши ҳамда таъмирлаш ишлари учун 4 млрд 985 млн сўм сарфланади. Мазкур қурилишлар Боғот, Қўшкўпир туманлари ва Урганч шаҳрида амалга оширилади.
Шунингдек, Янгиариқ туманидаги дала ўқув майдонини модернизация қилиш, электр тармоғи ва ҳожатхона қуриш учун 1,5 млрд сўм, бир нечта ҳудудларда йўлларга пиёдалар ҳаракатини чекловчи панжаралар ўрнатиш учун эса 1 млрд 22 млн сўм ажратилган.
Маданий тадбирлар ҳам йирик молиялаштирилган йўналишлардан бири бўлди. Қарорга мувофиқ, “Лазги” III халқаро рақс фестивалини ташкил этиш ва ўтказиш учун 2 млрд сўм ажратилган. Бу сумма умумий харажатлар таркибида энг катта бандлардан бири ҳисобланади.
Спорт соҳасига ҳам сезиларли маблағ йўналтирилган. Жумладан, вилоят футзал жамоаси фаолияти учун 600 млн сўм, Паҳлавон Маҳмуд хотирасига бағишланган халқаро турнир учун 498,1 млн сўм, оммавий югуриш мусобақалари учун эса 250 млн сўм ажратилган.
Ижтимоий ва соғлиқни сақлаш йўналишлари ҳам қамраб олинган. Хусусан, ядро тиббиёти хизматларини ривожлантириш лойиҳаси учун 550 млн сўм, кўп қаватли уйларни таъмирлаш учун 683,5 млн сўм, лифтларни техник синовдан ўтказиш учун эса 276 млн сўм йўналтирилган.
Шунингдек, давлат бошқаруви ва техник инфратузилмани ривожлантириш мақсадида “Рақамли вазиятлар маркази”ни ташкил этиш учун 550 млн сўм, солиқ тизимини техник жиҳатдан таъминлаш учун 388,3 млн сўм, киберхавфсизлик аудити учун эса 20 млн сўм ажратилган.
Таҳлил шуни кўрсатадики, ажратилган маблағларнинг асосий қисми қурилиш ва инфратузилма лойиҳаларига йўналтирилган бўлса, ундан кейинги ўринда маданий тадбирлар ва спорт харажатлари туради. Ижтимоий йўналишлар, жумладан соғлиқни сақлаш ва уй-жой коммунал соҳасига ажратилган маблағлар эса нисбатан камроқ улушни ташкил этади.
