Наманганда солиқ инспекцияси ходимига нисбатан жиноий иш очилди
У МЧЖлардан бирининг 376 млн сўмдан ошиқ солиқ қарздорлигини бартараф этиш ва пора бўйича ишга аралашган.
Чуст тумани солиқ инспекцияси ходимига нисбатан жиноят иши қўзғатилди.
Коррупцияга қарши курашиш йўналишида Давлат хавфсизлик хизматининг Наманган вилояти бўйича бошқармаси ходимлари томонидан Иқтисодий жиноятларга қарши курашиш департаменти билан ҳамкорликда тезкор тадбир ўтказилган.
Унда Чуст туманида яшовчи, 1992 й.т. аёл савдо соҳасида фаолият кўрсатувчи масъулияти чекланган жамият иш юритувчисининг ишончига кириб, МЧЖнинг 376,6 млн сўм миқдоридаги солиқ қарздорлигини ушбу тизимда ишловчи танишлари ёрдамида бартараф қилиб бериш эвазига, ундан 20 млн сўм олган вақтида ашёвий далиллар билан ушланди.
Терговга қадар текширув давомида мазкур ноқонуний ишга Чуст тумани солиқ инспекциясининг бош инспектори алоқадор эканлиги аниқланди.
Ҳозирда ҳолат юзасидан қонунбузарларга нисбатан жиноят иши қўзғатилиб, тергов ҳаракатлари олиб борилмоқда.
