ОАВ: Қозоғистонга алоқадор хакерлар Ўзбекистондаги вазирлик ва ҳокимликларга ҳужум қилган
Тадқиқотчилар Қозоғистондан келиб чиққан дея тахмин қилинган Yorotrooper гуруҳига тегишли янги жосуслик кампаниялари ҳақида хабар беришди.
Қозоғистонга алоқадор ҳакерлар Ўзбекистоннинг вилоят ҳокимликлари, илмий-тадқиқот институтлари ва Сув хўжалиги вазирлигига ҳужум қилгани айтилди.
Киберхавфсизлик соҳасида дунёнинг етакчи тадқиқот марказларидан бири — VMRay тадқиқотчилари Қозоғистондан келиб чиққан деб тахмин қилинган Yorotrooper гуруҳига тегишли янги жосуслик кампаниялари ҳақида хабар беришди.
Мутахассисларнинг фикрига кўра, ҳужумлар Марказий Осиёнинг бир қатор мамлакатлари, шунингдек, Россияга таъсир кўрсатган.
Hydra Saiga деб номланган аниқланган кампаниялардан бири сув ресурсларини бошқариш ва энергетика билан шуғулланадиган агентликлар ва ташкилотларга қаратилган эди.
Ҳисоботга кўра, шубҳали нишонлар орасида қуйидагилар бор эди:
-Қирғизистондаги гидроэлектрстанция оператори ва сув ресурслари агентлиги;
-Ўзбекистон минтақавий маъмурияти, илмий-тадқиқот институти ва Сув ресурслари вазирлиги;
-Тожикистон Энергетика ва сув ресурслари вазирлиги.
Бундан ташқари, тадқиқотчилар ҳужумлар Россиядаги иккита сув таъминоти компаниясига ҳам қаратилган бўлиши мумкинлигини даъво қилмоқдалар, аммо бу ҳодисалар тафсилотлари ошкор қилинмаган.
VMRay маълумотларига кўра, ушбу кампаниядаги фаоллик 2024 йил сентябридан 2025 йил мартигача кузатилган.
