Фан арбоби Сарвар Қодиров вафот этди

Ўзбекистонда хизмат кўрсатган фан арбоби Сарвар Муқаддирович Қодиров 86 ёшида вафот этди.

Сарвар Қодиров 1940 йил 11 февралда Тошкент шаҳрида туғилган. У 1962 йилда Тошкент политехника институтини тамомлаб, меҳнат фаолиятини шу даргоҳда ассистент сифатида бошлаган. Кейинчалик Москва автомобил институтида стажёр-педагог ва аспирант бўлиб фаолият юритган.

Фаолияти давомида Тошкент автомобил йўллар институтида доцент, кафедра мудири, профессор, ўқув ишлари бўйича проректор, 1995-2005 йилларда эса ректор лавозимларида ишлаган. Автотрактор двигателлари ва автомобил транспорти эксплуатацияси йўналишида илмий мактаб яратган етук олим сифатида эътироф этилган.

2003 йилда қизи Ойдин Қодирова билан ҳаммуаллифликда русча-инглизча автомобил ва трактор луғатини тузган. Мазкур луғат Россия техника олийгоҳларида қўлланилмоқда.

57 йилдан ортиқ илмий-педагогик фаолияти давомида кўплаб дарслик ва ўқув қўлланмалар яратган. Асарлари Россия ва Ҳиндистондаги таълим муассасаларида ҳам фойдаланилмоқда. Шунингдек, 40 га яқин рисола, очерк, қисса ва романлар муаллифи бўлиб, айрим асарлари хорижий тилларда нашр этилган.