АҚШ ва Европа давлатлари фуқароларни Эронга бормасликка чақирди

АҚШ Давлат котиби Марко Рубио АҚШ фуқароларини Эронга саёҳат қилмасликка чақирди. У ҳозирда Эронда бўлган америкаликларни дарҳол мамлакатни тарк этишни тавсия қилди.

Буюк Британия, Чехия Республикаси, Италия ва Германия ташқи ишлар вазирликлари ҳам Эронга саёҳат қилмасликни ва мамлакатни тарк этишни тавсия қилишди.

Бундан ташқари, Мексика ва Ўзбекистон расмийлари ўз фуқароларини Эрон ва Исроилга ташриф буюришда хавфсизликка жиддий ёндашишга чақирдилар. Баъзи давлатлар иккала мамлакатдаги дипломатик ходимларни тўлиқ ёки қисман эвакуация қилишди.

АҚШ президенти Доналд Трамп агар Теҳрон Вашингтоннинг ядровий келишув шартларини бажармаса, Эронга "ёмон оқибатлар" билан таҳдид қилди.

Шу билан бирга, Қўшма Штатлар 2003 йилда Ироққа бостириб кирганидан бери Яқин Шарққа ўзининг энг катта ҳаво кучларини, шунингдек, ўндан ортиқ кемаларни жойлаштирди. Эрон ҳукумати ахборот кенгаши раҳбари Элиас Ҳазрати Теҳрон Вашингтон талаб қилганидек, уран экспорт қилмаслигини ёки уранни бойитишни тўхтатмаслигини айтди.