Шимолий Кореяда Украина уруши қурбонларининг оилаларига уй берилди

Шимолий Кореяда Россия–Украина урушида ҳалок бўлган аскарларининг оилалари учун турар-жой мавзесини очилди.

Расмийларга кўра, лойиҳа урушда ҳалок бўлган ҳарбийларни шарафлаш ва уларнинг оилаларини қўллаб-қувватлашга қаратилган бўлиб, ташаббус бевосита Ким Чен Ин раҳбарлигида амалга оширилди.

Шимолий Корея Россия қўшинлари сафида Украинада жанг қилаётган пайтда ҳалок бўлган шимолий кореялик аскарлар оилалари учун Пхенянда янги турар-жой мавзеси қуриб битказилганини маълум қилди. Бу раҳбар Ким Чен Иннинг уруш қурбонларини шарафлашга қаратилган навбатдаги ташаббуси ҳисобланади.

Давлат ОАВлари тарқатган суратларда Ким Чен Ин янги кўча — Саэппёл кўчаси — бўйлаб сайр қилаётгани ва тобора кўпроқ жамоатчилик олдида қизи билан айрим оилаларнинг уйларига ташриф буюргани акс этган. У “Ватан учун борини фидо қилган ёш шаҳидлар” олдидаги қарзни адо этишга ваъда берган.

Сўнгги ойларда Шимолий Корея Россиянинг Украинага қарши урушида қатнашиш учун юборилган аскарларни улуғловчи тарғиботни кучайтирди.

Хусусан, хотира девори барпо этилди ва музей қурилди. Таҳлилчилар буни ички бирдамликни мустаҳкамлаш ҳамда жамоатчилик норозилигининг олдини олишга қаратилган ҳаракат сифатида баҳоламоқда.

Ким сўнгги ойлар ичида Россия президенти Владимир Путиннинг Украинага қарши урушини қўллаб-қувватлаш учун минглаб аскарлар ва катта миқдорда ҳарбий техника, жумладан артиллерия ва ракеталарни юборди. Вашингтон билан алоҳида қарама-қаршиликлар фонида икки етакчи ҳар доимгиданда яқинлашмоқда.

Жанубий Корея Миллий разведка хизмати ўтган ҳафта уруш давомида 6 минг нафар шимолий кореялик ҳарбий ҳалок бўлган ёки яраланганини тахмин қилаётганини маълум қилди, бироқ қурбонлар сони бўйича аниқ тафсилот бермади. Ўтган йили агентлик тахминан 600 киши ҳалок бўлганини билдирган эди.

Ёпиқ эшиклар ортида ўтган брифингда қатнашган қонунчилар сўзларига кўра, разведка хизмати шимолий кореялик ҳарбийлар замонавий жанговар тажриба ва Россиянинг техник ёрдамини қўлга киритаётганини, бу эса уларнинг қурол тизимлари самарадорлигини ошириши мумкинлигини таъкидлаган.

Янги кўчанинг қурилиши Шимолий Корея ой охирида йирик ҳукмрон партия қурултойини ўтказишга тайёргарлик кўраётган бир пайтга тўғри келмоқда.

Унда Ким келгуси беш йил учун ички ва ташқи сиёсатдаги асосий мақсадларини эълон қилиши ҳамда ҳокимиятини янада мустаҳкамлаш бўйича қўшимча чоралар кўриши кутилмоқда.