Украина собиқ энергетика вазири чегарадан ўтаётганда қўлга олинди
Ушбу мансабдор "Энергоатом" ва бизнесмен Тимур Миндич иштирокидаги машҳур коррупция можароси фонида ишдан ҳайдалганди.
Украинанинг собиқ энергетика вазири Герман Галушченко мамлакатни тарк этишга уринаётганда ҳибсга олинди.
2025 йил ноябр ойида истеъфога чиққан Украинанинг собиқ энергетика вазири Герман Галушченко 15 феврал кечаси мамлакат чегарасини кесиб ўтишга уринаётганда ҳибсга олинди. Бу ҳақда "Украинска правда" ва "РБК-Украина" манбаларга таяниб хабар берди.
"Украинска правда" хабарига кўра, Галушченко поезддан туширилган. Нашр манбасининг аниқлик киритишича, чегара хизмати ходимлари Украина Миллий коррупцияга қарши кураш бюроси (НАБУ) ва Ихтисослаштирилган коррупцияга қарши кураш прокуратураси (САПО)дан Галушченко чегарани кесиб ўтиш ниятида бўлган тақдирда маълумот олиш учун сўров олган.
НАБУ Галушченконинг ҳибсга олинганини тасдиқлади.
"Бугун, давлат чегарасини кесиб ўтаётганда, НАБУ детективлари собиқ энергетика вазирини "Мидас" иши бўйича ҳибсга олишди", дейилади баёнотда.
Галушченко 2021 йил апрел ойида Украина энергетика вазири этиб тайинланган ва 2025 йил июл ойида у Адлия вазири лавозимига ўтказилди. Унинг кетишидан сўнг, Свитлана Гринчук Украина Энергетика вазирлиги раҳбари бўлди. 2025 йил ноябрь ойида Украина Олий Радаси иккала шахсни ҳам Украинанинг "Энергоатом" ва бизнесмен Тимур Миндич иштирокидаги коррупция можароси билан боғлиқ ҳолда ишдан бўшатди.
Галушченконинг уйида ҳам ушбу иш бўйича Украина коррупцияга қарши кураш агентликларининг "Мидас" операцияси доирасида тинтув ўтказилди.
