ФИФА раҳбари Инфантино Россияни халқаро футболга қайтариш тарафдори эканини айтди

ФИФА раҳбари Инфантино Россияни халқаро футболда қайта тиклаш тарафдори эканини билдирди.

Украина расмийлари бу фикрни масъулиятсиз деб баҳолаб, уруш давом этар экан Россияга спорт майдонларида ўрин бўлмаслигини таъкидлади.

“Биз, албатта, Россияни қайта тиклаш масаласини кўриб чиқишимиз керак, чунки бу тақиқ ҳеч нарсага эришмади. У фақат кўпроқ ҳафагарчилик ва нафратни келтириб чиқарди”, — деди Инфантино Sky телеканалига берган интервьюсида.

Россия 2022 йил февралида Украинага бостириб кирганидан бери халқаро футболдан четлатилган. Ўша йили Қатарда ўтган Жаҳон чемпионатидан чиқариб юборилган ва бу ёз АҚШ, Мексика ва Канадада бўлиб ўтадиган 2026 йилги турнир саралашларида ҳам иштирок этмаган.

Эркаклар терма жамоаси шундан бери фақат ўртоқлик учрашувларини ўтказиб келмоқда. 2018 йил Россияда ўтган, жамоа чорак финалга чиққан Жаҳон чемпионатидан буён бирорта ҳам расмий мусобақада ўйнамаган.

2023 йилда Европа футболини бошқарувчи УЕФА Россиянинг U17 (17 ёшгача) терма жамоаларига мусобақаларда қатнашишга рухсат беришни қисқа муддат режалаштирган эди.

Улар "болаларни ҳукумат ҳаракатлари учун жазолашни истамаймиз” деган эди. Бироқ ўнлаб миллий федерациялар босимидан сўнг УЕФА бу режасини амалга оширмади.

УЕФА ижроия қўмитаси 11 февраль куни йиғилади ва Россияни клуб ҳамда терма жамоалар мусобақаларига қайтаришни кўриб чиқиши мумкин.

Бироқ УЕФА президенти Александер Чеферин Россия рақобатбардош футболга қайтиши учун Украинага бостириб кириш тугаши кераклигини айтган.

Украина Инфантино сўзларига жавоб берди.

Украина спорт вазири Матвий Бидний Sky Newsʼга шундай деди: “Жанни Инфантинонинг сўзлари масъулиятсизлик каби янграйди”.

“Уруш — бу сиёсат эмас, жиноят”, — деди Бидний. “Спортни сиёсатлаштираётган ва уни тажовузни оқлаш учун ишлатаётган Россиянинг ўзи. Мен Россиянинг халқаро мусобақаларга қайтишига қарши огоҳлантираётган Украина футбол ассоциацияси позициясини қўллаб-қувватлайман".

"Россияликлар украинларни ўлдиришда ва спортни сиёсийлаштиришда давом этар экан, уларнинг байроғи ва миллий рамзларининг адолат, ҳалоллик ва фейр-плей каби қадриятларни ҳурмат қиладиган одамлар орасида ўрни йўқ”.

Дарҳақиқат, Инфантино сўзларидан бир кун ўтиб, Украина расмийлари Россия Киевга зарбаларни қайта бошлаганини маълум қилди.

Бу АҚШ президенти Доналд Трамп эълон қилган совуқ мавсумдаги танаффусдан кейин юз берди. Украина томони жароҳатлар, энергетика инфратузилмасига ҳужумлар ва фавқулодда иситиш узилишлари ҳақида хабар берди.