Уругвайдан Трампга ёқмайдиган қадам: мамлакат Хитой билан алоқаларни кучайтиради

Трамп босимига қарамай Хитой ва Уругвай стратегик ҳамкорликни чуқурлаштирмоқда.

Уругвай президенти Яманду Орсининг Пекинга ташрифи чоғида Хитой ва Уругвай фан, технология ва савдо соҳаларини қамраб олган ўнлаб битимларни имзолади.

АҚШ президенти Доналд Трампнинг Хитой таъсирини Лотин Америкасидан четда сақлаш бўйича босимига қарамай, Хитой ва Уругвай стратегик ҳамкорликни чуқурлаштиришга келишиб олди.

3 феврал куни Пекинда Уругвай президенти Яманду Орси ва Хитой президенти Си Цзинпин ўртасидаги учрашувдан сўнг икки давлат фан, технология ва савдо каби соҳаларни қамраб олган ўнлаб ҳамкорлик битимларини имзолади.

Орси ижтимоий тармоқлардаги постида Уругвай фаол халқаро алоқаларни юритаётгани, узоқ муддатли ришталарни мустаҳкамлаётганини қайд этди ва "бу мамлакат ривожи учун янги имкониятлар яратмоқда", деб ёзди.

Хитой томони тарқатган баёнотга кўра, Си Цзинпин уругвайлик ҳамкасбига умумий тараққиёт йўлида ҳамкорликни кучайтириб, ҳар томонлама стратегик шерикликни чуқурлаштиришга чақирган.

Орсининг Хитойга етти кунлик ташрифи 1 феврал куни бошланган ва у кейин Шанхайга боради. Президентга бизнес етакчилари ва бошқа ҳукумат амалдорларини ўз ичига олган 150 кишилик делегация ҳамроҳлик қилмоқда.

Унинг сафари диққат билан кузатилмоқда, чунки у январь бошида Каракасда қонли тунги рейд чоғида АҚШ махсус кучлари Венесуэла президенти Николас Мадурони олиб кетганидан бери Хитойга ташриф буюрган илк Лотин Америкаси етакчиси бўлди.

Маҳаллий ОАВга кўра, Орси Мадуронинг олиб кетилишидан кейин дарҳол Уругвай ҳарбий аралашувни рад этишини айтган, бироқ кейинроқ Мадуронинг четлатилишини авторитар режим барҳам топиб, демократия пайдо бўлиши нуқтаи назаридан яхши хабар деб баҳолаган.

Шунга қарамай, Орсининг Хитой билан алоқалари Трампни ранжитиши мумкин, чунки у АҚШнинг Ғарбий ярим шардаги устунлигини қайта тиклашга уринмоқда.

Оқ Уйнинг 2025 йил ноябрьда эълон қилинган Миллий хавфсизлик стратегиясига кўра, АҚШ минтақани душманона хорижий аралашувдан холи сақлашни мақсад қилган — бу Хитойга ишора сифатида талқин қилинмоқда.

“Орси билан бирга 150 кишилик, жумладан бизнес етакчилари ҳам бор делегацияни олиб келиши Хитой Лотин Америкаси мамлакатлари учун ҳануз асосий иқтисодий ва савдо ҳамкори эканини ва улар Пекин билан алоқаларни давом эттиришга содиқ эканини кўрсатади”, — деди Халқаро инқирозлар гуруҳининг Шимолий-Шарқий Осиё бўйича катта таҳлилчиси Уилям Янг.

Орсининг Facebook саҳифасида эълон қилинган маълумотларга кўра, Хитой Уругвайнинг мол гўшти, соя ва сут маҳсулотлари каби экспортлари учун йирик бозор бўлиб, ўтган йили уларнинг қиймати 3,49 миллиард долларни ташкил этган. Шунингдек, Уругвай ўтган йили Хитойдан 2,8 миллиард долларлик маҳсулот импорт қилган.

Орси Вашингтонни ранжитиш эҳтимолига қарамай, Хитой билан алоқаларни йўлга қўйишга тайёр бўлган ягона етакчи эмас.

Уругвай етакчисининг сафаридан аввал Хитойга Буюк Британия бош вазири Кир Стармер, Канада бош вазири Марк Карни, Финляндия бош вазири Петтери Орпо ва Франция президенти Эммануэл Макрон ташриф буюрган эди.