"Узум Маркет" номидан одамлар номига кредит олган бункер фош этилди
Улар ажратилган кредит ва микроқарз лимитларини тўлиқ ўзлаштиришган.
Тошкент шаҳри Чилонзор туманидаги кўп қаватли уй ертўласида ноқонуний колл-марказ – кибербункер фаолияти фош этилди.
Аниқланишича, 1994 йилда туғилган шахс (олдин фирибгарлик билан 2 марта судланган) ва унинг шериклари фуқароларга қўнғироқ қилиб, "Узум Маркет" ютуқли ўйинида ютуқ чиққанини айтиб, алдов йўли билан кредит расмийлаштирганликлари аниқланган.
Жиноий гуруҳ аъзолари ўзларини мазкур платформа аъзоси сифатида рўйхатдан ўтказган, харидорлар ишонмаган тақдирда эски буюмларни уларга етказиб беришларини айтган.
Бу йўл орқали жабрланувчиларнинг эътиборини чалғитиб, уларга ажратилган кредит ва микроқарз лимитларини тўлиқ ўзлаштиришган. Пул ўтгач, кўп ҳолатда мижозлар билан алоқа узилган.
Текширув давомида кибербункернинг 16 нафар аъзоси ушланган. Дастлабки маълумотларга кўра, улар 50 нафар одамнинг 250 млн сўмга яқин пулини ўзлаштириб олишган.
Тезкор тадбир давомида 22 та компютер, мобил телефонлар, сим карталар, пластик карталар ва 2,5 мингдан ортиқ фуқароларнинг шахсий ва молиявий маълумотлари ашёвий далил сифатида олинган.