Мирзо Улуғбек тумани бош солиқчиси ишдан кетди

Ўтган ҳафта Мирзо Улуғбек тумани солиқ инспекциясининг бошлиғи Д.Усманов ишдан олиниб, жиноят иши қўзғатилди. Бу ҳақда Президент Шавкат Мирзиёев йиғилишида маълум қилинди.

У инспекция биносининг бир қисмини шахсий мақсадда ижарага бериб, 315 миллион сўмни ўзлаштирган, иш фаолиятида гуруҳбозликка ва маишатбозликка берилган.

Тошкент шаҳрида яширин ва кузатилмайдиган иқтисодиёт 60 триллион сўмга етган, бу буджет йилига 7,5 триллион сўмни йўқотяпти дегани.

Биргина аксиз солиғи тўловчилар ишлаб чиқариш ва реализация ҳажмини яширгани оқибатида 66 миллиард сўм солиқдан қочилган.

Яширин иқтисодиётга қарши курашиш ва солиқ маъмурчилиги бўйича пойтахт солиқ органларининг иши мутлақо қониқарсиз экани қайд этилди.

Масалан, қўшимча қиймат солиғи тўловчиларнинг қарийб 30 минги ҚҚСнинг бирор сўмини тўламаган. Ёки савдо, сервис ва умумий овқатланишдаги касса аппаратининг тўртдан бири ишлатилмаяпти.

Айрим солиқ бошлиқлари тушумни кўпайтириш ўрнига қўштирноқ ичидаги “тадбиркор”ларга “ҳомийлик” қилиш билан бандлиги кўрсатиб ўтилди. Масалан, шаҳарда ўтказилган текширувларда 70 миллиард сўм солиқ ҳисобланмасдан қолгани аниқланган. Сўнгги икки йилда шаҳар солиқ идораларининг 19 нафар ходими коррупсия бўйича жиноий жавобгарликка тортилган, буджетга 27 миллиард сўм зарар етказилган.