Мексикадаги футбол майдонида отишма: 11 киши ҳалок бўлди

Мексикада футбол майдонида оммавий отишма юз берди: 11 киши ҳалок бўлди, 12 нафари яраланди.

Расмийлар воқеани ҳудуддаги жиноий гуруҳлар ўртасидаги зўравонлик билан боғламоқда.

Қуролланган шахслар Мексиканинг марказий қисмидаги футбол майдонида ўқ узиб, 11 кишини ўлдирди, 12 нафарини яралади.

Якшанба куни Мексиканинг марказий қисмидаги футбол майдонида қуролланган шахслар ўқ узиб, камида 11 кишини ўлдирди ва 12 нафарини яралади, дея маълум қилди расмийлар.

Саламанка шаҳри мэри Сезар Приэто ижтимоий тармоқларда эълон қилинган баёнотида қуролланган шахслар футбол ўйини якунланган пайтда келганини айтди.

Воқеа жойида 10 киши ҳалок бўлган, яна бири кейинчалик шифохонада вафот этган. Мернинг сўзларига кўра, жароҳатланганлар орасида бир аёл ва бир нафар вояга етмаган шахс ҳам бор.

Приэто бу ҳужум шаҳарда кузатилаётган жиноятчилик тўлқинининг бир қисми эканини таъкидлаб, зўравонликни назорат қилишда ёрдам сўраб Президент Клаудия Шейнбаумга мурожаат қилди.

Гуанахуато штати прокуратураси ҳодиса бўйича тергов олиб борилаётгани ва ҳудудда хавфсизликни кучайтириш учун федерал ҳокимият органлари билан ҳамкорлик қилинаётганини билдирди.

Ўтган йили Гуанахуато Мексикада қотилликлар сони энг юқори бўлган штат эди. Маҳаллий “Санта Роса де Лима” жиноий гуруҳи қудратли “Халиско Янги Авлод” картели билан тўқнашиб келмоқда.

“Афсуски, айрим жиноий гуруҳлар ҳокимиятни бўйсундиришга уринмоқда, аммо бунга эриша олмайди” — деди мэр.

Умуман олганда, Мексика ҳукумати маълумотига кўра, 2025 йилда мамлакатда қотиллик даражаси 100 минг аҳолига 17,5 та ҳолатни ташкил этиб, 2016 йилдан буён энг паст кўрсаткич бўлган.

Бироқ таҳлилчилар бу рақамлар мамлакатдаги зўравонликнинг реал манзарасини тўлиқ акс эттирмаслиги мумкинлигини таъкидламоқда.