АҚШда кучли бўрон сабаб камида 7 киши ҳалок бўлди
Бу об-ҳаво бир неча кун давом этиши мумкин ва бўрон тахминан 180 миллион америкаликка, яъни мамлакат аҳолисининг ярмидан кўпроғига таъсир кўрсатиши тахмин қилинган.
АҚШда кучли бўрон камида 7 кишининг ҳаётига зомин бўлди.
АҚШ бўйлаб тарқалган кучли қишки бўрон оқибатида камида етти киши ҳалок бўлди, 800 мингдан ортиқ хонадон электр таъминотисиз қолди.
АҚШ Маҳаллий об-ҳаво хизмати маълумотига кўра, Техасдан тортиб Янги Англиягача чўзилган ҳаёт учун хавфли об-ҳаво шароитлари туфайли мамлакат бўйлаб мактаблар ва йўллар ёпилди, кўплаб рейслар бекор қилинди.
Луизиана штатида камида икки киши гипотермия оқибатида ҳалок бўлган. Шунингдек, бўрон билан боғлиқ ўлим ҳолатлари Техас, Теннесси ва Канзас штатларида ҳам қайд этилган.
Маълумотларга кўра, 800 мингдан ортиқ хонадон электр таъминотисиз қолган. Шу билан бирга, Flight Aware хабарига кўра, 11 мингдан зиёд авиарейс бекор қилинган.
Кенг ҳудудларда кучли қор, қор аралаш ёмғир ва музли ёмғир кузатилмоқда. Музли ёмғир — совиган ёмғир томчилари ерга ёки буюмлар устига тушиши билан дарҳол музлаб қоладиган хавфли ҳодисадир.
Бу об-ҳаво бир неча кун давом этиши мумкин ва бўрон тахминан 180 миллион америкаликка — яъни мамлакат аҳолисининг ярмидан кўпроғига таъсир кўрсатиши тахмин қилинмоқда.
Луизиана соғлиқни сақлаш департаменти икки нафар эркак гипотермия сабабли вафот этганини тасдиқлади.
Техас штатининг Остин шаҳри мэри совуққа дучор бўлиш билан боғлиқ бир ўлим ҳолати қайд этилганини билдирди.
Канзас расмийларининг айтишича, қор остидан топилган аёл “эҳтимол гипотермия оқибатида вафот этган”.
Теннесси штатида ҳам об-ҳаво билан боғлиқ уч нафар фуқаронинг ўлими ҳақида хабар берилган.
Ню-Йорк шаҳри мери Зохран Мамдани Х ижтимоий тармоғидаги постида шаҳарда камида беш киши вафот этганини, бироқ уларнинг ўлим сабаби ҳали аниқланмаганини ёзди. Ню-Йорк штати губернатори Кэти Хокул аҳолини уйда қолишга ва йўлларга чиқмасликка чақирди.
“Бу сўнгги йилларда кузатилган энг совуқ об-ҳаво, энг совуқ қишки бўрондир”, — деди у. “Гўё Арктика қамали штатимизни ва мамлакатдаги кўплаб бошқа ҳудудларни эгаллаб олгандек.”
Штатларнинг деярли ярми фавқулодда ҳолат эълон қилган. Бўрон 27 январгача давом этиши кутилаётгани сабабли, мамлакат бўйлаб мактаблар дарсларни бекор қилмоқда. Ҳодиса сабаб АҚШ Сенати ҳам белгиланган овоз беришни бекор қилди.