Тошкентда ҳавони ифлослантираётган корхона фаолияти тўхтатилди
Махсус комиссиянинг тунги текшируви давомида Олмазор туманида экологик талабларни бузган ишлаб чиқариш объекти аниқланган.
Тошкентда ҳавони тозалаш бўйича рейдлар давом этмоқда: навбатдаги корхона фаолияти тўхтатилди.
Махсус комиссиянинг тунги текшируви давомида Олмазор туманида экологик талабларни бузган ишлаб чиқариш объектининг фаолияти аниқланиб, у вақтинча тўхтатилди.
Тошкентда атмосфера ҳавосига зарарли чиқиндилар чиқараётган манбаларни аниқлаш ва бартараф этиш бўйича фаол ишлар давом этмоқда.
Олмазор туманида махсус комиссия томонидан ўтказилган навбатдаги тунги рейд чоғида экологик меъёрларни қўпол равишда бузган ҳолда фаолият юритаётган саноат корхонаси аниқланди.
Текширув натижаларига кўра, мазкур объектида ишлаб чиқариш жараёнлари атроф-муҳитни муҳофаза қилиш бўйича белгиланган талабларига риоя этилмаган ҳолда амалга оширилгани маълум бўлди. Шу сабабли хусусий корхона фаолияти аниқланган камчиликлар тўлиқ бартараф этилгунга қадар вақтинча тўхтатилди.
Бундай текширувлар Тошкентда ҳавони тозалашга қаратилган кенг кўламли стратегиянинг бир қисмига айланган.
Назорат тадбирлари мунтазам равишда, жумладан, рухсатсиз чиқиндилар чиқариш хавфи юқори бўлган тунги вақтларда ҳам ўтказилмоқда.
Аввалроқ Президентнинг экология масалалари бўйича маслаҳатчиси Азиз Абдуҳакимов раҳбарлигида ўтказилган шунга ўхшаш рейдлар Янги ҳаёт ва Сергели туманларидаги саноат ҳудудларини ҳам қамраб олган эди.