Кредит тўлови кечикканда йиллик 150–180 фоизгача жарима қўлланилган —Марказий банк

Марказий банк томонидан тижорат банкларининг кредит шартномаларида тўловлар кечиктирилганда қўлланилаётган жарима ва санкциялар таҳлил қилинди.

Ўрганишлар айрим амалиётлар адолат ва мутаносиблик тамойилларига зид эканини кўрсатди.

Таҳлиллар натижасида айрим банкларда:

- кечиктирилган тўловлар учун ҳисобланадиган фоиз ставкалари шартномада белгиланган йиллик ставкага нисбатан бир неча баробарга, айрим ҳолатларда йиллик 150–180 фоизгача оширилаётгани;

- кредит бўйича фоизларни тўлаш кечиктирилганда энг юқори чегараси белгиланмаган кунлик пеня ҳисобланаётгани;

- кредиторнинг ҳақиқий харажатлари билан боғлиқ бўлмаган қўшимча бир марталик жарималар қўлланилаётгани аниқланган.

Шу муносабат билан Марказий банк:

- кечиктирилган мажбуриятлар учун қўлланиладиган санкцияларнинг компенсацион характерга эга бўлишига эътибор қаратиш;

- қарз олувчилар учун тўловни кечиктириш билан боғлиқ молиявий оқибатларнинг аниқ ва олдиндан тушунарли бўлишини таъминлаш;

- кредит шартномаларида жавобгарлик чораларини адолат ва мутаносиблик тамойиллари асосида белгилаш лозим деб ҳисоблайди.

Аввалроқ Рақобат қўмитаси ва Марказий банк ҳамкорлик меморандуми имзолаганди.

Ҳужжат асоссиз нарх ошиши ва монопол мавқе суиистеъмол қилинишига қарши курашиш, нарх шаклланиши жараёнларининг шаффофлигини таъминлашга қаратилган маълумот алмашишни кўзда тутади.