Жанубий Корея собиқ бош вазири 23 йилга қамалди
У 2024 йил декабрда собиқ президент Юн Сук Ёл томонидан эълон қилинган ҳарбий ҳолат билан боғлиқ исён ҳаракатларида иштирок этган деб топилди.
Жанубий Корея собиқ бош вазири Ҳан Дук-Су 23 йилга қамалди.
Суднинг қарорига кўра, у 2024 йил декабрда собиқ президент Юн Сук Ёл томонидан эълон қилинган ҳарбий ҳолат билан боғлиқ исён ҳаракатларида иштирок этган.
Собиқ бош вазир Ҳан суд томонидан ҳарбий ҳолат билан бевосита боғлиқ жиноят айбловлари бўйича ҳукм чиқарилган биринчи собиқ вазирлар кабинети аъзоси бўлди. Ҳуқуқшуносларнинг айтишича, бу ҳукм бошқа суд жараёнлари учун намуна бўлиши мумкин.
Сеул Марказий туман суди Ҳан айбдор деб топди, у президент Юн Сок Ёлга ҳарбий ҳолат эълон қилишга ёрдам берган, деб айтди судья. Судья буни "юқоридан пастга қаратилган исён" деб таърифлади.
Судья қўшимча қилиб, Ҳан парламент каби асосий институтлар фаолиятини тўхтатиш режалари ҳақида ҳам муҳокама қилганини айтди.
Суд Ҳанни исён асосий ҳаракатларида иштирок этиш, шунингдек, ёлғон гувоҳлик бериш ва расмий ҳужжатни сохталаштириш айбловлари бўйича айбдор деб топди. Ҳан суд ҳукми бўйича эътирози йўқлигини маълум қилди.
У шу пайтгача ёлғон гувоҳликдан ташқари барча айбловларни рад этган эди. Ноябр ойида у Юн ҳарбий ҳолат эълон қилишини тўхтата олмагани учун пушаймон эканини, лекин ҳеч қачон рози бўлмаган ёки ёрдам бермаганини айтган эди.
Суд ҳукмдан сўнг Ҳанни дарҳол ҳибсга олди. Ҳукм устидан шикоят қилиниши мумкин. Ҳаннинг адвокати ишни Олий судга олиб боришини айтди.
"Тажрибали сиёсатчи"
Ҳан беш нафар президент даврида юқори лавозимларда ишлаган тажрибали технократдир. Юн импичмент қилинганидан кейин у вақтинчалик президент вазифасини бажариб турган, аммо ўзи ҳам ҳарбий ҳолат эълон қилишда Юнга ёрдам берганликда айбланиб импичмент қилинган.
Конституциявий суд Ҳаннинг импичментини бекор қилиб, унга раҳбарлик ваколатларини қайтарган, кейин у июн ойида навбатдан ташқари сайловда қатнашиш учун лавозимдан истеъфо берган. Консерваторлар орасидаги келишмовчиликлар туфайли у президентликка номзодлигини тўхтатган.
Иши саккизта судда кўриб чиқилган Юн ўтган ҳафтада беш йиллик қамоқ жазосига ҳукм қилинган эди. У қарордан норозилигни билдириб, судга шикоят қилган.
19 феврал куни Юнга нисбатан яна ҳукм чиқиши кутилмоқда. Унга энг оғир айблов — “исённи бошқариш” айблови қўйилган. Прокурорлар бу ишда ўлим жазосини сўрашган, бироқ Жанубий Кореяда охирги марта ўлим жазоси 1997 йилда ижро этилган.