Россиялик яна бир пропагандачи Ўзбекистон ва бошқа давлатлар суверенитетига "тош отди"

Рус файласуфи ва сиёсатшуноси, пропагандист Александр Дугин суверен Ўзбекистон ва бошқа собиқ совет республикаларининг суверен мавжудлигига шубҳа билан қаради ва миллий давлатлар даври "тугаганини" эълон қилди.

Дугиннинг сўзларига кўра, Россия назорати остида бўлмаган ҳудудлар АҚШ ва Европа Иттифоқининг, шунингдек, эҳтимол Хитойнинг "форпостлари"га айланади.

У "улар бизнинг Бирлашган Иттифоқимизнинг бир қисмига ёки Ғарбнинг таянч нуқтасига айланади" деб таъкидлади.

"Рус дунёси" деб аталадиган мафкурачи фикрига кўра, суверенитети тан олинмайдиган мамлакатлар қаторида у Арманистон, Грузия, Озарбайжон, Қозоғистон, Ўзбекистон, Тожикистон ва Қирғизистонни тилга олди.

Файласуф ўз нутқида Россиянинг замонавий "уч қутбли дунё"даги мақсади "энг муҳим ҳокимият маркази"га айланиш эканлигини ва у чекка ҳудуддаги мустақил давлатларни стратегик таҳдид сифатида қабул қилишини таъкидлади.

Унинг баёнотлари мутахассислар ва таҳлилчилар орасида хавотир уйғотади, чунки улар халқаро ҳуқуқда мустаҳкамланган давлат суверенитети тамойилига тўғридан-тўғри шубҳа туғдиради ва Марказий Осиё ва Кавказдаги бир қатор давлатларнинг мустақиллигини шубҳа остига қўяди.

Дугин Илйин номидаги Сиёсий фанлар олий мактаби ва Халқаро Евросиё ҳаракатига раҳбарлик қилади.

2014 йилда Foreign Policy журнали уни дунёнинг энг нуфузли 100 мутафаккири рўйхатига киритди.

Эслатиб ўтамиз, аввалроқ бошқа бир пропагандист Владимир Соловев Арманистон ва Марказий Осиёда ҳарбий операция ҳақида гапирган вва ҳудудларни Россия таъсир доираси деб атаганди.