Банкка қарзини тўламаган фуқаронинг автомобили мусодара қилинди
Сергели туманида “TBC Bank” олдидаги 31,7 миллион сўмлик қарз сабаб аёлнинг “Cobalt” автомобили мажбурий тартибда мусодара қилинган. Машина аукционда сотилади.
Сергелида аёл банк олдидаги қарзи сабаб автомобилидан айрилди.
Сергели туманида “TBC Bank” олдидаги 31,7 миллион сўмлик қарз сабаб аёлнинг “Cobalt” автомобили мажбурий тартибда мусодара қилинди.
Автомобил мусодара қилинди, дея хабар бермоқда Тошкент шаҳар Мажбурий ижро бюроси матбуот хизмати.
Сергели тумани Мажбурий ижро бюросига Мирзо Улуғбек туманлараро фуқаролик ишлари бўйича судининг 2024 йил 24 декабрдаги қарори келиб тушган. Мазкур қарорга кўра, фуқародан “TBC Банк” фойдасига 31,7 миллион сўм ундириш белгиланган. Иш 2025 йил 20 ноябр куни ижрога қабул қилинган.
Фуқарога қарзни 15 кун ичида ихтиёрий равишда тўлаш ҳуқуқи берилган, бироқ белгиланган муддатда тўлов амалга оширилмаган.
Мажбурий ижро жараёнида фуқаро яширишга уринган “Cobalt” русумли автомобил қидирувга тушган. Маълум вақтдан сўнг автомобил топилиб, жарима майдончасига жойлаштирилган.
Ҳозирда транспорт воситасини онлайн аукцион орқали сотувга қўйиш бўйича чоралар кўрилмоқда. Савдодан тушган маблағ қарзни қоплашга йўналтирилади, қолган қисми эса автомобил эгасига қайтарилади.