Трамп маъмурияти Гренландия бўйича келишув лойиҳасини тайёрлади
Вашингтон орол аҳолисининг турмуш даражасини яхшилайдиган Эркин Уюшма Шартномасини муҳокама қилган. АҚШ президентининг даъволари Европа сиёсатчиларида ҳам хавотир уйғотган.
АҚШ президенти Доналд Трамп маъмурияти Гренландия бўйича келишув лойиҳасини ишлаб чиқмоқда, уни орол расмийларига таклиф қилиши мумкин. Бу ҳақда Британиянинг The Economist журнали ёзган.
Нашрнинг ёзишича, Вашингтон Гренландия аҳолисининг турмуш даражасини яхшилайдиган Эркин Уюшма Шартномасини муҳокама қилмоқда.
АҚШ аллақачон Микронезия, Маршалл ороллари ва Палау билан шунга ўхшаш келишувларга эга: Вашингтон молиявий ёрдам кўрсатади, шериклар эса мудофаа масалаларини унга топширади, ички ўзини ўзи бошқаришни сақлаб қолади.
The Economist нашрининг таъкидлашича, Трамп маъмуриятининг Гренландия сиёсати иккита мақсадни кўзлайди: Дания ва Гренландия ўртасидаги келишмовчиликларни кучайтириш ва Копенгагенни четлаб ўтиб, орол расмийлари билан келишувга эришишга уриниш.
Бироқ, журнал оролнинг "тўлиқ аннекция қилиниши" эҳтимолдан йироқ деб ҳисоблайди ва АҚШнинг даъволари Европа раҳбарлари орасида хавотир уйғотганини таъкидлайди.
Нашрнинг таъкидлашича, Гренландияда АҚШ ҳарбий базаси аллақачон жойлашган ва Дания билан мавжуд келишувлар АҚШ қўшинлари сонини чекламайди. Гарчи сезиларли даражада кўпайтириш Копенгагеннинг розилигини талаб қилса-да, жаноб Трамп 4 январь куни Қўшма Штатлар миллий хавфсизлик нуқтаи назаридан Гренландияни назорат қилишига муҳтожлигини айтди. Унинг таъкидлашича, "орол атрофида Россия ва Хитой кемалари бор эди".