Делси Родригес вақтинчалик Венесуэла президенти этиб тайинланди

Николас Мадуронинг давомчиси Делси Родригес вақтинчалик Венесуэла президенти этиб тайинланди.

У 2018 йилдан буён вице-президент лавозимини ўтаб келаётган эди. Ушбу лавозимга уни Мадуронинг ўзи тайинлаган.

АҚШ томонидан уюштирилган 3 январдаги ҳужумдан сўнг, Венесуэла президенти Николас Мадуро АҚШ ҳарбийлари томонидан қўлган олинди. Хабар бериб ўтганимиздек, у АҚШ да судга тортилиши маълум бўлган эди.

Ушбу фавқулодда вазиятда, Венесуэла Олий судининг Конституциявий палатаси вице-президент Делси Родригес Николас Мадуро йўқлигида мамлакатнинг муваққат президенти вазифасини бажаришини қарор қилди.

Суд қарорида айтилишича, Родригес маъмурий бирликни таъминлаш ва миллатнинг ҳар томонлама мудофаасини кафолатлаш мақсадида Венесуэла Республикасининг Президенти лавозимини эгаллайди.

Делси Родригес ким?

Делси Родригес 1969 йил 18 майда туғилган. У 1970 йилларда инқилобий Liga Socialista партиясига асос солган сўл қанот партизан жангчиси Хорхе Антонио Родригеснинг қизи ҳисобланади.

У ҳуқуқшунос ва Венесуэладаги ҳукмрон Бирлашган социалистик партия (PSUV)нинг етакчи арбобларидан бири бўлиб, сўнгги ўн йил давомида мамлакатдаги энг қудратли лавозимлардан бир нечтасини эгаллаб келган. У 2014 йилда ташқи ишлар вазири этиб тайинланган.

2018 йил июн ойида Родригес вице-президент этиб тайинланган. Бу ҳақда Мадуро Х тармоғида эълон қилиб, уни “ёш, жасур, тажрибали, шаҳиднинг қизи, инқилобчи ва минглаб синовлардан ўтган аёл” дея таърифлаган.

Фаолияти давомида Родригес Мадуро ҳокимиятини доимий ва очиқ ҳимоя қилиб келган. Ташқи ишлар вазири сифатида у Венесуэлани Бирлашган Миллатлар Ташкилоти ва бошқа халқаро форумларда вакиллик қилган, Венесуэлада демократия таназзулга учраётгани ҳақидаги айбловларни рад этган ҳамда Мадуро ҳукуматига нисбатан АҚШ ва Европа томонидан жорий этилган санкцияларни кескин танқид қилган.

У вице-президентлик лавозими билан бир вақтда молия вазири ва нефт вазири сифатида ҳам фаолият юритиб келган. Бу эса уни Венесуэла иқтисодиётини бошқаришда муҳим шахсга айлантирган ва заифлашган хусусий сектор устидан катта таъсир кучини берган. Инфляцияни жиловлаш мақсадида у нисбатан анъанавий (ортодокс) иқтисодий сиёсатни қўллаган.

3 январь куни давлат телевидениесида намойиш этилган аудио мурожаатида Родригес АҚШ ҳукуматидан Мадуро ва унинг рафиқаси тирик эканини тасдиқловчи далиллар тақдим этишни талаб қилди. Ҳозирча уларнинг аниқ қаердалиги номаълум.