Буюк Британия тўртта Ўзбекистон компаниясига қарши санкция киритди

Буюк Британия Россияга қарши жорий этилган санкциялар рўйхатини кенгайтирди. Бу ҳақда ҳукуматнинг расмий сайтида эълон қилинган ҳужжатда маълум қилинди.

Қайд этилишича, янгиланган рўйхатга 24 нафар янги шахс ва ташкилот киритилган. Улар орасида Ўзбекистонда фаолият юритувчи тўртта компания ва бир нафар тадбиркор ҳам бор.

Санкциялар доирасида ушбу шахс ва ташкилотларнинг Буюк Британия ҳудудидаги банк ҳисобварақлари музлатилади, шунингдек, уларга нисбатан қўшимча молиявий ва бизнес чекловлари жорий этилади.

Ҳужжатга кўра, чекловлар Фарғона кимё заводи, Gelion Business Trade, Chemistry International ва Raw Materials Cellulose компанияларига, шунингдек, Тошкентда туғилган тадбиркор Рустам Мўминовга татбиқ этилган.

Энг қатъий чоралар Фарғона кимё заводига нисбатан қўлланган. Британия расмийлари корхонанинг молиявий активларини музлатган ҳамда унга нисбатан траст (ишончли бошқарув) хизматларини кўрсатишни тақиқлаган.

Лондон версиясига кўра, ушбу завод Украина суверенитетига путур етказишда фойдаланилиши мумкин бўлган маҳсулот ёки технологияларни етказиб берган бўлиши эҳтимоли мавжуд.

Шунингдек, Тошкентда рўйхатдан ўтган Gelion Business Trade компаниясига ҳам санкциялар қўлланилган. Расмий ҳужжатда ушбу фирма Украинадаги вазиятни беқарорлаштиришга хизмат қилувчи товарлар етказиб беришда иштирок этган бўлиши мумкинлиги қайд этилган. Худди шу асослар билан қолган уч компанияга нисбатан ҳам чекловлар жорий этилган.

Санкциялар рўйхатига киритилган тадбиркор Рустам Мўминов Тошкентда туғилган бўлиб, ҳужжатга кўра, у Ўзбекистон, Исроил ва Россия фуқаролигига эга. Британия томони уни вазиятни беқарорлаштиришга йўналтирилган бўлиши мумкин бўлган молиявий ресурслар ёки хизматларни таъминлаганликда гумон қилмоқда.