Трамп тинчлик келишуви имзоланиши вақтида ухлаб қолди
Авваллари Трампнинг ўзи рақиби Жо Байденнинг мажлисларда ухлаб қолиши ёки самолёт трапида қоқилишини танқид қилиб келарди.
АҚШ президенти Доналд Трамп Руанда ва Конго Демократик Республикаси ўртасидаги тинчлик келишуви имзоланиши маросимида ухлаб қолди.
Ўтган ҳафта Доналд Трамп телевидениеда намойиш этилган Вазирлар Маҳкамаси йиғилиши давомида ухлаб қолгани эди. 4 декабрда у яна Руанда ва Конго Демократик Республикаси ўртасидаги тинчлик шартнома имзоланиш жараёнида бироз ухлаб олди.
Тантанада Руанда президенти Пол Кагаме минбардан нутқ сўзлаётган пайтда Трамп кўзларини юмиб, боши пастга кетиб қолгани аниқ кўринди. Кагаме нутқини тугатгач, Конго президенти Феликс Тшисекеди минбарга йўл олганида ҳам Трамп пинакка кетганди.
Бахтига, 79 ёшли президент учун икки давлат раҳбарларининг нутқлари 15 дақиқадан ошмади. Бу эса 2 декабрдаги икки соатлик ҳукумат йиғилишидан анча қисқа эди. Бироқ халқаро ОАВлар иштирок этган бундай маросимда Трампнинг ҳушёр туриши кутиларди ва унинг эътиборсизлиги мутахассисларнинг танқидига сабаб бўлди.
Ўтган ҳафта The New York Times Трампнинг жисмоний ва руҳий ҳолати ёмонлашаётгани ҳақида хабар берган эди, бу эса президентнинг ғазабига сабаб бўлди. Аммо у омма олдида яна қайта-қайта ухлаб қолаётган бир пайтда, айниқса охирги шифокор кўригида нима сабабдан МРТ ва қўшимча текширувлардан ўтганини ҳисобга олсак, газетанинг хабари тўғри эканлигини кўриш мумкин.
Авваллари Трампнинг ўзи рақиби Жо Байденнинг ухлаб қолиши ёки самолёт трапида қоқилишини танқид қилиб келарди.