Покистон-Афғонистон чегарасида яна тўқнашувлар авж олди
Октябр ойидаги қуролли ҳаракатлардан сўнг Қатар ва Туркия воситачилигида сулҳ тузилганди. Навбатдаги жангларда 4 киши ҳалок бўлган.
Покистон-Афғонистон чегарасида тўқнашувлар қайта бошланди, қурбонлар борлиги ҳақида хабар берилган.
Тахминан тўрт соат давом этган жанг Афғонистоннинг Қандаҳор вилоятидаги Спин Болдак чегара шаҳри яқинида бўлиб ўтди. Қандаҳор шаҳридаги BBC манбасининг хабар беришича, тўрт нафар ҳалок бўлганларнинг жасади маҳаллий шифохонага олиб кетилган. Покистон уч киши яраланганини хабар қилди.
Спин Болдакдан бир кечада қочқинлар оқими оқиб келмоқда, видеоларда кўплаб одамлар пиёда ва машиналарда қочиб кетаётгани кўрсатилган. Қўшни қишлоқлар аҳолиси ҳам қочиб кетмоқда.
Сўнгги ойларда мамлакатлар ўртасида қуролли можаролар бир неча бор авж олди, "Толибон" Покистонни ўз ҳудудига ҳаво ҳужумларини уюштирганликда айбламоқда. Шунингдек, "Толибон" Покистонда ҳужумлар уюштирган қуролли гуруҳларга бошпана берганликда айбламоқда. "Толибон" ҳукумати Покистоннинг "ўз хавфсизликдаги муваффақиятсизликлари" учун айбни бошқа томонга ўгираётганини айтмоқда.
Иккала томон ҳам бир-бирини икки ойдан камроқ вақт олдин Қатар ва Туркия воситачилигида эришилган сулҳни бузганликда айбламоқда. Покистон Бош вазири Шаҳбоз Шарифнинг матбуот котиби Мушарраф Зайди "Толибон"ни "сабабсиз ўққа тутишда" айблади, "Толибон" вакили эса Покистон "яна ҳужумларни бошлаганини" ва улар жавоб беришга мажбур бўлганини даъво қилди.
Ўтган ҳафта икки томон делегациялари Саудия Арабистонида кенгроқ тинчлик ўрнатиш бўйича тўртинчи босқич музокаралари учун учрашдилар, аммо ҳеч қандай келишувга эришилмади.