"Ёлғиз европалик": Эммануэл Макрон Хитойга борди
Франция президенти Хитой орқали Россияга босим ўтказиши тахмин қилинган. Аммо таҳлилчилар унинг имкониятини паст баҳолади.
Хитой раҳбари Си Цзинпиннинг таклифига биноан Франция Президенти Эммануэл Макрон Пекинга етиб келди ва Хитойга уч кунлик давлат ташрифини бошлади.
Бу Макроннинг Хитойга тўртинчи давлат ташрифи саналади. Ўтган йили Си Цзинпиннинг Хитой ва Франция ўртасида дипломатик муносабатлар ўрнатилганининг 60 йиллигини нишонлаш учун Францияга қилган тарихий давлат ташрифидан кейинги жавоб сафари саналади.
Ташриф давомида Си Цзинпин Макрон билан Хитой-Франция муносабатларини янги шароитда ривожлантиришга биргаликда раҳбарлик қилиш учун музокаралар олиб боради. Икки етакчи, шунингдек, долзарб халқаро ва минтақавий масалалар бўйича чуқур фикр алмашадилар.
Хитой Ташқи ишлар вазирлиги вакилининг сўзларига кўра, Хитой ушбу ташрифни Хитой ва Франция ўртасида дипломатик муносабатларни ўрнатишга асосланган руҳни илгари суриш, стратегик алоқаларни мустаҳкамлаш, прагматик ҳамкорликни чуқурлаштириш ва кўп томонлама форматларда мувофиқлаштиришни фаоллаштириш имконияти сифатида кўради.
Шу тариқа, икки томон ҳам Хитой-Франция кенг қамровли стратегик шериклигида янги ютуқларга эришишга ва Хитой-Европа Иттифоқи муносабатларининг соғлом ва барқарор ривожланишини таъминлашга, кўп томонлама муносабатларни қўллаб-қувватлашга ва дунё тинчлиги, барқарорлиги ва фаровонлигини сақлашга катта ҳисса қўшишга интилади, дея хулоса қилди Хитой Ташқи ишлар вазирлиги вакили.
Бир неча йил олдин, Европа Иттифоқи Си Цзинпинни Кремлнинг Украинага қарши тажовузини қўллаб-қувватлашни тўхтатишга, савдо номутаносиблигини тузатишга ва Хитой бозорини Европа компаниялари учун очишга кўндиришга умид қилган эди.
Германия, Испания ва Франция раҳбарлари Европа Комиссияси президенти Урсула фон дер Ляйен билан биргаликда кетма-кет Пекинга ташриф буюрди.
Аммо таҳлилчиларга кўра, бу фойда бермади, Хитойнинг Россия билан алоқалари тўхтаб қолмади.
Европа Иттифоқи ва Хитой ўртасидаги муносабатлар дипломатик алоқалар ўрнатилганидан бери 50 йил ичида энг паст нуқтага етгани шу йилнинг июль ойида Пекинда бўлиб ўтган юбилей саммитида аниқ бўлди.
Ўшандан бери шикоятлар фақат кучайди: Европа Иттифоқи Россияга Украина билан урушда ёрдам бераётган Хитой компанияларига қарши санкциялар жорий қилди ва умуман олганда Хитойга нисбатан позициясини қатъийлаштиришга қарор қилди. Шу билан бирга, сиёсий инқироз ва муддатнинг тугаётгани Макроннинг Европа етакчиси сифатидаги мавқеини заифлаштирди.