Трамп Байден электрон имзо билан тасдиқлаган барча афв ҳужжатларини бекор қилмоқчи

АҚШнинг амалдаги президенти Доналд Трамп собиқ президент Жо Байден электрон имзо билан тасдиқлаган барча афв ҳужжатларини бекор қилмоқчи.

Трамп Байденнинг руҳий ҳолати яхши эмаслигини, баъзи қарорларни у эмас, балки унинг ёрдамчилари қабул қилганини даъво қилмоқда.

Трампнинг айтишича, у ўзидан аввалги президент Жо Байден автопен (автоматик имзо қурилмаси) ёрдамида имзолаган барча ҳужжатларни, жумладан афвларни, бекор қилмоқда. Ҳуқуқ экспертлари эса бундай қарор судда кучга эга бўлишига шубҳа билдирмоқда.

Автопен — бу инсон имзосини аниқ тарзда такрорлайдиган қурилма бўлиб, одатда катта ҳажмдаги ёки расмий-ҳужжатлар учун қўлланади. Уни АҚШда икки йирик сиёсий партия президентлари ҳам йиллар давомида мактублар ва фармонларни имзолашда ишлатиб келган.

Трамп ва унинг тарафдорлари Байденнинг президентлик даврида автопен қурилмасидан фойдаланиши унинг ҳужжатларини ғайриқонуний қилиб қўйган ёки Байден бу ҳужжатлардан тўлиқ хабардор бўлмаган деган асоссиз даъволарни илгари сурмоқда. Байден афв фармонларини имзолашда автопен ишлатганми ёки йўқ, бу ҳали аниқ эмас.

Трамп Truth Social тармоғида шундай ёзди: “Кимки автопен орқали имзоланган афв, жазони енгиллаштириш ёки бошқа ҳар қандай юридик ҳужжат олган бўлса, билингки, бу ҳужжат тўлиқ бекор қилинади ва ҳеч қандай юридик кучга эга эмас”.

Сент-Томас университети Ҳуқуқ факултети профессори Марк Ослер:

“Президент аввалги раҳбарнинг афвларини бекор қила олиши мумкинлиги ҳақида фикр шу пайтгача ҳеч кимдан чиқмаганди” — деди.

Стенфорд Ҳуқуқ мактаби профессори Бернадет Мейлер эса: “Трампнинг автопен ишлатилгани учун афвларни бекор қилиши ҳақидаги даъвосининг ҳеч қандай конституциявий ёки юридик асоси йўқ” — деди.

Мичиган штати университети профессори Брайан Калт эса электрон почта орқали шундай изоҳ берди:

“Маъмурият авфларнинг ҳақиқийлигини фақат судга даъво киритиш орқали бекор қилиши мумкин. Суд уларни ҳақиқий эмас деб топиши учун, Байден уларни ўзи тасдиқламаганини исботлаши керак бўлади”.

Байден тарафидан изоҳ берилмади. Байден президентлик муддатининг охирларида, жумладан, сиёсий таъқиблардан ҳимоя қилмоқчи бўлган айрим оила аъзоларини ҳам афв этган. У, шунингдек, наркотик билан боғлиқ жиноят содир этган тартибли жиноятчиларни ҳам жазоларини енгиллаштирган.

Трамп эса, одатдагидек кескин сиёсий услуби билан, Байденнинг автопен орқали ҳужжатларни имзолаганини кўп бора танқид қилган. Трумп Байденнинг руҳий ҳолати яхши эмаслигини, баъзи қарорларни Байден эмас, балки унинг ёрдамчилари қабул қилганини даъво қилган. Байден ва унинг собиқ ёрдамчилари бу айбловларни рад этган.

Ўтган ҳафта Трамп АҚШГА тонналаб кокаин олиб киришга тил бириктиришда айбланиб, судланган собиқ Гондурас президенти Хуан Орландо Эрнандесни авф қилди. Трамп бунга ҳеч қандай далил келтирмаган ҳолда, Эрнандес Байден маъмурияти томонидан “сиёсий ўйин” қурбони бўлганини айтди.