“Биз очиқ ва замонавий ахборот муҳитини яратмоқдамиз”

Ўзбекистон Президенти администрацияси ҳузуридаги Оммавий ахборот воситалари учун контент тайёрлаш маркази директори Қобулжон Аҳмедов Бокуда бўлиб ўтган Туркий давлатлар ташкилоти (ТДТ) оммавий ахборот воситалари, ахборот учун масъул вазирлари ва расмийлари 7-йиғилиши доирасида “Тренд” агентлигига интервю берди.

Аҳмедов ўз сўзида дастлаб Ўзбекистонда кенг кўламли ислоҳотлар амалга оширилаётгани, жумладан медиа маконини ривожлантириш, ёш мутахассислар тайёрлашга алоҳида эътибор қаратилаётганини таъкидлади.

– Биз мамлакатдаги ижобий ўзгаришлар суръатини акс эттирувчи очиқ ва замонавий ахборот муҳитини яратмоқдамиз, – деди у. – Айни жараёнда ёш ҳамкасбларимизни қўллаб-қувватлаш асосий йўналиш сифатида белгиланган. Шунингдек, ёшлар медиа салоҳиятини ривожлантиришга қаратилган кўплаб дастурлар – мобил журналистика ва ижтимоий медиа бўйича ўқув курслари, блогерлар ва ижодкорлар учун амалий машғулотлар йўлга қўйилган.

Ўзбекистонлик эксперт туркий дунё мамлакатларини бирлаштириб турадиган бой маданий мерос ва умумий интилиш мавжуд ҳамкорликни кенгайтириш учун улкан салоҳият яратишини таъкидлади.

– Ўзбекистон ТДТ фаолиятида назарда тутилган барча ташаббуслар, жумладан истеъдодлар алмашинуви, биргаликда контент ишлаб чиқаришга тайёр, – деди Марказ директори.