Зеленский офиси раҳбари ишдан олинди: у фронтга кетмоқчи

Украина президентининг маъмурияти раҳбари Андрий Ермак лавозимидан озод этилди.

Ермак Украина президенти Владимир Зеленскийдан кейин иккинчи энг қудратли шахс сифатида кўриларди.

Украина президентининг маъмурияти раҳбари Андрий Ермак йиллар давомида мамлакатдаги иккинчи энг қудратли шахс сифатида кенг танилган эди.

Унинг ишдан кетиши Президент Владимир Зеленскийни айниқса нозик паллада яқин сиёсий иттифоқчисиз қолдирди. Россия босқини бошланганига қарийб тўрт йил бўлган бир паллада Украина АҚШ билан музокаралар олиб бормоқда ва Зеленский ҳукумати мухолифат босимига тобора кўпроқ дуч келмоқда.

Хусусан, Ермакнинг истеъфоси тинчлик музокаралари истиқболига ҳам янги шубҳалар солди. Чунки Ермак бу жараёнда муҳим роль ўйнаган эди.

54 ёшли Ермак Россиянинг босқини бошланганидан бери Зеленский ёнида туриб, унинг ўнг қўли ва моҳир воситачи сифатида муҳим сиёсий фигурага айланган эди.

Улар илк бор шоу-бизнес оламида танишган. Зеленский комедиян бўлган, Ермак эса кино продюсери ва интеллектуал мулк ҳуқуқига ихтисослашган медиа юристи эди. Зеленский 2019 йилда ҳокимиятга келган пайтда, улар бир-бирини анча яхши танишган.

Ермак дастлаб президент маслаҳатчиси сифатида, асосан, ташқи сиёсат масалалари билан шуғулланиш учун ёлланган. 2020 йил февраль ойида у президент девони раҳбари бўлди ва Украинадаги энг нуфузли шахслардан бирига айланди. Аммо кўплар унинг қўполлигини ва майда-чуйда ишларни ҳам ўзи бошқаришга уринишини танқид қилишарди.

Россиянинг 2022 йил февралидаги тўлиқ миқёсли босқини бошланганидан кейин у ва Зеленский ўртасидаги муносабат янада мустаҳкамланди.

Украина сиёсатида Ермак ҳар қандай керагидан ортиқ гапирган ёки Зеленскийга потенциал рақиб бўлиши мумкин бўлган амалдорларни лавозимидан олиши билан танилган қўрқинчли қаттиққўл ижрочига айланган эди. У, шунингдек, урушдаги воқеалар бўйича ҳукуматга қаратилган танқидларни ўзига қабул қилиб, Зеленскийни ҳимоя қилиб келган.

Лекин сўнгги вақтларда Ермакнинг Украинада жуда рейтинги пасайиб кетгани айтилади. Украина тадқиқот маркази март ойида ўтказган сўровномага кўра, респондентларнинг атиги 17,5 фоизи унга ишонч билдирган.

Мухолифат депутатлари Ермакнинг бу ойда юзага чиққан коррупция можарлосидаги шахсларга яқинлиги сабабли унинг истеъфосини талаб қилганидан кейин ҳам Зеленский Ермакни лавозимида қолдирганди.

Кўп ўтмай, Ермак АҚШ расмийлари билан Женевада ўтказилаётган музокараларда Киев делегациясига раҳбарлик қила бошлади. У Россия фойдасига ҳаддан ташқари ён босилган деб баҳоланган режадаги бандларни юмшатишга ҳаракат қилаётган эди.

Бу музокаралар АҚШ армияси котиби Даниэл П. Дрисколл билан ушбу ҳафта Киевда давом эттирилиши керак эди. 27 ноябрь куни кечгача Ермак ушбу музокараларда иштирок этишини билдирганди.

Гарчи у бу иш бўйича расмий равишда гумондор сифатида тилга олинмаган бўлсада, эртаси куни тонгда Ермакнинг уйи коррупция тергови доирасида тинтув қилинди.

Сўнгги маълумотларга кўра, Ермак фронтга кетиш истагини билдирган. The New York Post нашрига кўра, Ермак бу қарорга мустақил равишда келган.

“Мен фронтга кетяпман ва ҳар қандай топшириққа тайёрман. Мен ҳалол ва одобли инсонман”, деди Ермак ва у “Украинага хизмат қилганини” ва президент Владимир Зеленский учун “муаммо яратишни” истамаслигини қўшимча қилди.